Samarqanddagi prank mashmashasi, sudi davom etayotgan Ahmadboy, Bezosning mlrdlarga tushgan ajrimi va boshqa xabarlar
Jamiyat
−
06 iyul 2019
57596 iyul kuni ham nihoyasiga yetib qoldi. Quyida siz bilan kunning muhim xabarlariga qisqacha to‘xtalib o‘tamiz.
Video: Samarqanddagi shov-shuvli voqea hazil bo‘lib chiqdi
Kecha, 5 iyul kuni ijtimoiy tarmoqlarda Samarqand shahrida niqob taqqan yigit tramvayga chiqib, noma’lum suyuqlikni sepishi oqibatida bir necha kishi hushidan ketgani haqida xabarlar tarqaldi. Xabarlarga video ham ilova qilingandi. Videodagi voqea prank (tarmoq hazili) ekani ma’lum bo‘ldi. Video katta shov-shuvga sabab bo‘lgach, uni uyushtirganlarning o‘zi hammasi hazil ekanini ma’lum qilib, kechirim so‘radi.
Farg‘ona viloyatiga yangi bosh imom-xatib tayinlandi
O‘zbekiston musulmonlari idorasining Farg‘ona viloyatidagi vakili, viloyat bosh imom-xatibi Salim Qodirov o‘z ixtiyoriga binoan egallab turgan lavozimidan ozod etildi.
Farg‘ona viloyati Marg‘ilon shahar bosh imom-xatibi va “Xonaqoh” jome masjidi imom-xatibi Ubaydulloh domla Abdullayev Farg‘ona viloyati bosh imom-xatibi vazifasini bajaruvchi etib tayinlandi.
Sudoche ko‘lida sodir bo‘lgan yong‘in sabablari ma’lum bo‘ldi
Qoraqalpog‘istonning shimoli-g‘arbida joylashgan Sudoche ko‘lida yong‘in yuz berishiga tabiiy ofat sabab bo‘lgan. Sudoche ko‘liga egalik qiluvchi “Muynak akva sanoat” DUK rasmiylarining xabar qilishicha, yong‘in ko‘lning suvi yo‘q yoki sayoz joylardagi qamishzorlarda sodir bo‘lgan. Yong‘in 4 iyul kungi chaqmoq urishidan keyin boshlangan va kelgusi kuni ham kechgacha davom etgan. Olov shamol kuchi bilan vaqti-vaqti kuchayib, ko‘lami kengayib borgan.
Aripov Moskvada Medvedev bilan uchrashadi. U “O‘zbekiston” pavilonini ochib beradi
O‘zbekiston Respublikasi Bosh vaziri Abdulla Aripov Moskvaga boradi. U joriy yilning 10 iyul kuni Rossiya Federatsiyasi Bosh vaziri Dmitriy Medvedev bilan muzokaralar o‘tkazadi. O‘zbekiston Bosh vaziri va Rossiya Bosh vaziri o‘rinbosari Olga Golodets Xalq xo‘jaligi yutuqlari ko‘rgazmasi (VDNX) hududida “O‘zbekiston” pavilonini ochib beradi.
O‘zbekiston iqtisodining kuchli va kuchsiz tomonlari
“S&P Global Ratings” agentligi O‘zbekiston Respublikasi suveren kredit reytingi qayta baholanganini ma’lum qildi. Unga ko‘ra, mamlakat suveren kredit reytingi “VV-” (“Barqaror” prognozi) darajasida qayd etildi. Agentlik O‘zbekiston iqtisodiyotining kuchli va kuchsiz tomonlarini aytib o‘tdi.
TIV Rossiyadagi o‘zbekistonliklarga murojaat bilan chiqdi
O‘zbekiston Respublikasi fuqarolariga konsullik xizmatlari ko‘rsatish sifatini oshirish maqsadida 2019-yilning 1-iyul sanasidan O‘zbekiston Respublikasining Rossiya Federatsiyasidagi Elchixonasi Konsullik bo‘limi negizida yetti kanalli “Call-center” ishga tushirildi.
Biz ishlab chiqarayotgan avtomobillarning sifati Lada’nikidan yaxshiroq – UzAuto Motors rahbari
Asakada joylashgan UzAuto Motors’ga uyushtirilgan media-tur davomida tashkillashtirilgan Matbuot anjumanida UzAuto Motors zavodi bosh direktori vazifasini bajaruvchi Rustam Rajabov zavodda ishlab chiqarilayotgan avtomobillar va Lada avtomobillari sifati darajasi haqida fikr bildirib o‘tdi.
Mirziyoyev 2 yil oldin yopib yuborish kerak degan zavod o‘tgan yili 1 trln 375 mlrd daromad qilgan
QALAMPIR.UZ muxbirining ma’lum qilishicha, UzAuto Motors zavodi 2019 yilda 1 trln 375 mlrd so‘m sof foyda ko‘rgan. Bu haqda Asakada joylashgan UzAuto Motors’ga uyushtirilgan media-tur davomida tashkillashtirilgan Matbuot anjumanida zavod bosh direktori vazifasini bajaruvchi Rustam Rajabov jurnalistlarga ma’lum qildi.
Jurnalistlar tomonidan zavod rahbariga, 2017 yilda O‘zbekiston Respublikasi Prezidenti Shavkat Mirziyoyevning Andijon viloyatiga tashrifi davomida Asaka shahrida ham bo‘lib, zavod faoliyatini keskin tanqid ostiga olagni eslatildi va Rustam Rajabovdan prezidentning “Zavodni yopib yuborish kerak”, deya bildirgan keskin tanqidiga izoh so‘raldi.
Video: Ahmadboydan jabrlanganlarga pullari qaytarib beriladi
Ayni paytda jinoyat ishlari bo‘yicha Quyi Chirchiq tuman sudi binosida sudlanuvchilar Ahmadjon Tursunboyev va boshqalarga (sudlanuvchilarning umumiy soni – 16) nisbatan jinoyat ishining tergov bilan yakunlangan qismini ko‘rib chiqish bo‘yicha uchinchi ochiq sud bo‘lib o‘tmoqda.
Ushbu sud jarayonini ko‘rib chiqayotgan sudyaning ma’lum qilishicha, Ahmadboydan jabr ko‘rganlarga pullari qaytariladi.
Video: “Ippodrom” va “O‘rikzor” bozorlari yaqinidagi yo‘llarga kuzatuv kameralari o‘rnatildi
“Chilonzor” buyum bozori va “O‘rikzor” savdo majmuasi joylashgan yo‘llarda kuzatuv kameralari o‘rnatildi. Bu haqda “Davr” informatsion dasturi lavhasida ma’lum qilindi.
Kameralar bozor atrofida, taqiqlangan joyda avtomobilini qoldirib ketayotgan haydovchilarni jarimaga tortishga mo‘ljallangan.
Dunyoning eng boy odami rafiqasi bilan ajrashdi
Amazon kompaniyasi rahbari Jeff Bezos xotini Makkenzi bilan ajrashganini rasmiylashtirdi. Ma’lumotlarga ko‘ra, nikohning bekor qilinishi haqidagi rasmiy hujjatga Vashington shtati King okrugi sudyasi imzolagan. Endilikda Amazon kompaniyasining 38,3 mlrd dollarga teng 19,7 mln aksiyasini Bezosning sobiq xotiniga o‘tkazish jarayonini boshlash mumkin. Bu Makkenzini dunyoning eng boy ayollaridan biriga aylantiradi. Makkenzi xonim boyligining yarmini xayriya ishlariga sarflashini ma’lum qilgan.
Butun jahon talabalari Universiadasida ikkinchi medal qo‘lga kiritildi
Italiyaning Neapol shahrida Butunjahon talabalari o‘rtasida o‘tkazilayotgan Universiada o‘yinlarining ikkinchi kun bellashuvlari o‘z poyoniga yetdi. E’tiborlisi, ushbu kun doirasida bahslarga kirishgan O‘zbekiston terma jamoasi vakillari yana bir medalni delegatsiya hisobiga qo‘shib qo‘yishdi.
“Barselona” ilk transferi taqdimotini o‘tkazdi
Kataloniyaning “Barselona” klubi yangi mavsum avvalidagi ilk transferini omma oldida tanishtirdi. Kataloniyaliklar qishdayoq “Ayaks” yarim himoyachisi Frenki de Yongni o‘z safiga qo‘shib olgandi. Lekin shartnomaga ko‘ra futbolchi joriy yilning yozida klub ixtiyoriga kelib qo‘shilishi kerak edi.
PSJ Neymarni “Barselona”ga emas, “Real”ga sotmoqchi
Fransiyaning PSJ klubi Braziliya terma jamoasi futbolchisi Neymarni “Barselona”ga sotishni xohlamayapti. Bunga sabab sifatida kataloniyaliklar PSJni ogohlantirmay turib Neymar bilan kelishib olganligi aytilmoqda.
Nurmuhamedov navbatdagi jang oldidan va’da berdi
Bugun, 6 iyul kuni Rossiyalik aralash kurash jangchisi (MMA) Habib Nurmuhamedov matbuot anjumani vaqtida amerikalik sportchi Dastin Pore bilan o‘tadigan jang haqida gapirdi.
“O‘tgan jangda nima qilganim yodingizdami? Unvonni himoya qildim. Abu-Dabida ham huddi shunday qilaman. Biroq bu safar oktagondan sakrashsiz bo‘ladi. Raqibimga kelsak, Pore juda yaxshi jangchi. Uning bokschilik ko‘nikmalari yaxshi rivojlangan va harakati ham tez”, degan rossiyalik sportchi.
“Arsenal” “Barselona” va “Real” futbolchilari bilan muzokara o‘tkazmoqda
Londonning “Arsenal” klubi joriy yozda o‘z safiga bir qator kuchli futbolchilarni qo‘shib olish uchun muzokaralar o‘tkazmoqda.
Ayni paytda “kononirlar” Kataloniyaning “Barselona” klubidan braziliyalik forvard Malkomni xarid qilish uchun muzokaralar o‘tkazmoqda. “Ko‘k-anorranglilar” rahbariyati futbolchini sotib yuborishga qarshi emas. Ammo transferdan 40 mln yevro ishlab olishni maqsad qilmoqda. Londonliklar esa futbolchi uchun 30 mln taklif qilmoqda.
LiveBarchasi