Ҳусийлар 24 соат ичида АҚШ кемасига уч марта ҳужум қилди 

Яманнинг ҳусийлар гуруҳи  сўнгги 24 соат ичида Американинг USS Harry Truman авиаташувчи кемасига уч марта ҳужум қилди. Бу ҳақда ҳусийлар томонидан тузилган қуролли кучлар вакили Яҳё Сария маълум қилди.

“Охирги 24 соат ичида бизнинг қуролли кучларимиз Қизил денгизда АҚШнинг USS Harry Truman самолёт ташувчиси бошчилигидаги душман ҳарбий кемалари гуруҳларини уч марта тўқнашди. Тўқнашув операциясида ракета кучлари, учувчисиз самолётлар ва денгиз кучлари иштирок этди, улар бир нечта қанотли ракеталар ва учувчисиз учоқларни ишлатди”, деди ҳаракат вакили.

Эслатиб ўтамиз, 15 март куни Қўшма Штатлар Президент Дональд Трампнинг буйруғи билан Яман ҳудудининг учдан бир қисмини назорат қилаётган ҳусий нишонларига йирик зарбалар беришни бошлаганди. АҚШ Марказий қўмондонлигига кўра, операция Америка манфаатларини ҳимоя қилиш ва навигация эркинлигини таъминлашга қаратилган.

Бунга жавобан ҳусийлар ҳаракати Қизил денгиз шимолида Американинг USS Harry Truman авиаташувчи кемасига ракета ва учувчисиз самолётлар ёрдамида бир қатор ҳужумлар уюштирди.