Trampning buyrug‘i bilan AQSH qo‘shinlari Yamanga zarba berdi

Kecha, 15 mart kuni AQSH Qurolli kuchlari Prezident Donald Trampning buyrug‘i bilan Yamandagi husiylar nazorati ostidagi hududga ommaviy zarbalar berishni boshladi. Bu haqda AQSH Markaziy qo‘mondonligi xabar berdi.

“Operatsiya Amerika manfaatlarini himoya qilish va navigatsiya erkinligini ta’minlashga qaratilgan”, deyiladi xabarda.

“Al Hadath” telekanalining xabar berishicha, AQSH Qurolli kuchlari 15 mart kuni taxminan soat 19:00 dan 16 mart kuni soat 05:00 gacha Yamanning husiylar nazoratidagi hududlarini o‘qqa tutgan. 

“Zarbalar husiylar nazoratidagi poytaxt Sana, shuningdek, Al-Bayda, Al-Hodeyda, Saada, Hajja va Marib viloyatlaridagi nishonlarga berilgan”, deb xabar bermoqda telekanal.

“The New York Times”ning Amerika rasmiylariga tayanib, xabar berishicha, AQSH Prezidenti Donald Tramp husiylarga qarshi keng ko‘lamli harbiy operatsiya o‘tkazishga hozircha rozilik bermagan. Milliy xavfsizlik bo‘yicha maslahatchilar tomonidan tuzilgan rejaga ko‘ra, ko‘pchiligi yer ostida joylashgan husiy arsenallariga havo hujumlari bir necha hafta davom etishi mumkin. Ammo saylov kampaniyasi davomida yangi harbiy aralashuvlarga yo‘l qo‘ymaslikka va’da bergan Tramp Yaman shimolini husiylardan tortib olishi mumkin bo‘lgan yanada tajovuzkor strategiyani hali ma’qullamadi.

Husiylar harakati tinch aholi ob’ektlari nishonga olinayotganini da’vo qilib, keskinlashuvga javob berishga va’da berdi. Yaman Sog‘liqni saqlash vazirligining so‘nggi ma’lumotlariga ko‘ra, zarbalar oqibatida 31 kishi halok bo‘lgan, 100 dan ortiq kishi jarohatlangan.