Ҳусанов ЕЧЛнинг гуруҳ босқичидаги энг тезкор футболчиси бўлди

Ўзбекистон миллий терма жамоаси ҳамда “Манчестер Сити” клуби ҳимоячиси Абдуқодир Ҳусанов UEFA Чемпиолар лигасининг гуруҳ босқичидаги энг тезкор футболчиси деб топилди. Бу ҳақда “Gradient Sports” портали хабар берди.

Манбага кўра, Абдуқодир Ҳусанов Чемпионлар лигаси гуруҳ босқичида 35,80 км/соат тезлик қайд этган ва бу гуруҳ босқичидаги энг юқори кўрсатгич ҳисобланади. Ундан кейинги ўринда 35,67 км/соат тезлик билан Франция терма жамоаси ва “Реал Мадрид” ҳужумчиси Килиан Мбаппе бу рўйхатда иккинчи ўринни эгаллади. Кучли учликни “Ювентус” футболчиси Лоис Опенда якунлаган. Унинг кўрсаткичи 35,16 км/соат.

Маълумотларга кўра, Ҳусановнинг бу кўрсаткичи жорий йилнинг 28 январь куни “Манчестер Сити” ва “Галатасарой” учрашувида қайд этилган. Абдуқодир ушбу баҳсда тўлиқ 90 дақиқа ҳаракат қилган.

Жорий мавсум Чемпионлар лигасининг гуруҳ босқичида Ҳусанов тўртта учрашувда майдонга тушган ва барча ўйинларда интизомли ҳаракат қилиб, бирор марта ҳам огоҳлантириш олмаган. Шунингдек, у мазкур ўйинларда ўртача 95 фоиз аниқ паслар амалга оширган.

Эслатиб ўтамиз, аввалроқ “Sofascore” портали ҳам Чемпиолар лигасининг гуруҳ босқичидаги энг тезкор футболчилар рўйхатини тузиб чиққан эди. Унда Ҳусанов Килиан Мбаппедан кейин иккинчи ўринни олган.