Ҳокимлик алдади: Сурхондарёда аёллар мажбуран теримга чиқарилгани тасдиқланди

Аввалроқ, Сурхондарё вилояти, Қумқўрғон тумани ҳокимининг ўринбосари, Оила ва хотин-қизлар бўлими бошлиғи Нигора Жумаева аёлларни мажбурий меҳнатга, яъни пахта теримига жалб этгани ҳақида хабарлар тарқалгач, туман ҳокимлиги муносабат билдириб, пахта теримига чиққан аёлларнинг “кўнгилли” эканини, уларнинг “ўз ихтиёри” билан бунга рози бўлганини иддао қилганди. Эндиликда эса ўшанда аёллар ростдан ҳам мажбурий меҳнатга жалб қилингани ўз тасдиғини топди.

Камбағалликни қисқартириш ва бандлик вазирлигининг маълум қилишича, Қумқўрғон туманида ҳоким ўринбосари Нигора Жумаеванинг оила ва хотин қизлар фаолларига пахта теримига теримчиларни жалб қилишга топшириқ бергани тасдиғини топиб, унга нисбатан Маъмурий жавобгарлик тўғрисидаги кодекснинг 51-моддаси (Меҳнатга маъмурий тарзда мажбурлаш) 1-қисми асосида жарима қўлланилган. Ушбу моддага кўра, меҳнатга бирон-бир шаклда маъмурий тарзда мажбурлаш базавий ҳисоблаш миқдорининг эллик бараваридан юз бараваригача (20 млн сўмдан 41 млн сўмгача) миқдорида жарима солишга сабаб бўлади. 

Тармоқларда тарқалган аудиоёзувда ҳоким ўринбосари ҳар бир хотин-қизлар фаолидан камида 2 нафар аёлни ўзи билан бирга пахта теримига олиб чиқишни талаб қилганини эшитиш мумкин.

“Эртага эрталаб ҳамма соат 7 дан ҳар бир фаол ўзи билан бирга камида 2 нафардан теримчи аёлларни олиб, далага бориши керак. Шаҳар маҳаллалари олиб чиқадиган хотин-қизлар билан соат 6:30 да кўришамиз. Автобус шу ерда бўлади. Эрталаб 6:30 да пахтага чиққан бўлиши керак. Соат 9:00 да Маҳкамова келадиган бўляпти. Шунгача биз тайёрлаб, тозалаб, теримчилар далага тушиб кетган бўлиши керак.

Мен олиб келмадим, мени ишим чиқиб қолди, деган нарсани қилманглар. Бош вазир ўринбосари Маҳкамова келяпти, хазил ўйнаманглар. Ҳамма жиддий, виждонан ёндашингизлар. Ҳамма эрталаб келиб, айтилган нарсалар билан биргаликда ишларни ташкил қиласизлар. Соат 7 да ҳамма далада бўлиши керак, кечикиб 8 да судралиб юрманглар”, дейди Нигора Жумаева.

Туман ҳокимлиги эса буни ихтиёрий деб атаганди. Ҳокимликка кўра, жорий йилнинг 22 сентябрь куни Бош вазир ўринбосари, Оила ва хотин-қизлар қўмитаси раиси Зулайҳо Маҳкамова Қумқўрғон туманига ташриф буюриб, у ерда “Аёллар бандлигини таъминлаш, ишсизликдан ҳоли ҳудудга айлантириш” борасида олиб борилаётган ишлар билан танишган. Ташриф доирасида Мунчоқтепа маҳалласидаги “Мунчоқтепа истиқболи” фермер хўжалигида “Меҳнатим – фахрим” номли тадбир ташкил этилган. Тадбирда хотин-қизлар фаоллари билан бир қаторда теримда иштирок этаётган аёллар ҳам қатнашган. Улар “ихтиёрийлик асосида” тадбирда иштирок этиши белгилангани даъво қилинганди.

“Аудиоёзувда Жумаева томонидан маҳалла фаолларига тадбирни масъулият билан ташкил этиш ҳамда пахта теримида фаол иштирок этаётган кўнгилли аёлларнинг белгиланган вақтда далада бўлишини таъминлаш ҳақида топшириқ берилгани акс этган. Бироқ ушбу топшириқни мажбурий меҳнат сифатида талқин этиш мутлақо асоссиз”, дея муносабат берганди ўшанда ҳокимлик.