“Ҳокими бор бургутдек”. Шуҳрат Абдураҳмонов улуғланди

Жорий йилнинг 10 сентябрь куни “Андижон” футбол клуби мухлислари жамоасининг “Қўқон-1912”га қарши ўйини пайтида вилоят ҳокими Шуҳрат Абдураҳмоновни улуғловчи баннерни намойиш қилди.

Андижоннинг “Бобур Арена” стадионида бўлиб ўтган баҳсда “бургутлар” “Қўқон-1912” жамоасини Рустам Турдимуродов ва Имеда Ашортиянинг голлари эвазига 2:1 ҳисобида мағлубиятга учратди.

Ўйин аввалида намойиш қилинган баннерда “Ҳокими бор бургутдек, футбол бўлар доимо” ҳамда “Ҳоким бува, сиз бор, биз бор, доим бўлинг соғ-омон” деган империалистик руҳдаги ёзувлар акс этган. Унда бургут тасвири ҳам жойлаштирилган бўлиб, у Андижон футболининг рамзий қиёфаси сифатида талқин қилинган.

Умуман олганда, бу Андижон ҳокимининг биринчи марта катта эътибор марказига тушиши эмас. Бир қараса вилоят ҳокимлиги матбуот хизмати Абдураҳмоновнинг бир оилага хонадон совға қилаётгани акс этган видеони омматан тарқатса, бошқа бир ҳолатда эса миллийликни тарғиб қилиш деб изоҳланган “Андижон полькаси” рақсига тушиш мажбурий этилаётгани ҳақида хабарлар пайдо бўлади. Ҳокимлик ахборот хизмати пиарни яхши уддалайди. Бироқ ҳоким жаноблари салбий қабул қилинадиган ҳолатларда ҳам кўп эътибор марказига чиққан.

Масалан, 2024 йилда Андижоннинг Хонабод туманида бўлиб ўтган “Дунё садолари” фестивалига киролмаган журналистлар билан боғлиқ вазият кўпчиликнинг ёдида бўлса керак. Ўшанда ҳоким Шуҳрат Абдураҳмоновнинг “менинг гапларимдан кавак қидирмаларинг, қўлларингдан бало ҳам келмайди”, деган гапни ОАВ вакилларига айтгани иддао қилинган видеолар тарқалган эди.

Шунингдек, жорий йилда ёшлар куни муносабати билан вилоят ҳокимлиги ёшлар учун концерт тадбирини ташкил этганди. Унда бир қанча машҳурлар қаторида МДҲ мамлакатлари орасида “Дом-2” реалити телевизион шоуси орқали танилган россиялик телебошловчи ва блогер Виктория Боня ҳам концертга ташриф буюганди.

Қайд этилишича, Ахлоқсиз шоу орқали танилган бу “юлдузча”ни Абдураҳмоновнинг ўзи таклиф қилган. Буни Бонянинг Instagram ижтимоий тармоғига жойлаган вилоят ҳокими билан тушган суратидан билиш мумкин. Суратда Абдураҳмонов жанобларининг Боня хонимга бир даста гуллар ҳадя қилгани тасвирланган бўлиб, унинг изоҳида блогер томонидан концертга таклиф этгани учун Шуҳрат Абдураҳмоновга раҳмат айтилган. Бу сурат ҳам жамоатчилик муҳокамасига сабаб бўлганди.

Шуҳрат Абдураҳмонов нафақат Андижон вилояти балки “Андижон” клуби раҳбари эканлиги аввалдан маълум. У вилоят футбол ассоциацияси президенти сифатида ҳам фаолият юради. Хусусан, клуб мухлислари билан ўтказилган учрашувларда вилоят раҳбари жамоани қўллаб-қувватлашини билдириб келган.

Бунга оид мисоллардан бири 2023 йилда кузатилган эди. “Андижон” клуби Суперлиганинг 17-турида “Олимпик”ни 2:1 ҳисобида мағлуб этганидан сўнг Абдураҳмонов стадионда футболчилар билан ғалабани нишонлаган. Ўша учрашувдан кейин у футболчиларга махсус совғалар беришини айтган. Хусусан, ғалаба голи муаллифи Рубин Ҳебайга “тила тилагингни” дегандек, исталган автомашинани танлашини билдирганди. Бироқ қолган футболчилар қандай махсус совғага эга бўлгани очиқланмаган.

Шунингдек, 2025 йилги Ўзбекистон Кубогидаги ғалабасидан кейин Шуҳрат Абдураҳмонов “Андижон” жамоасининг келгуси мавсумда чемпионлик учун курашишини билдирганди. Айтганда ҳам, чемпионликни ваъда қилганди.

“Келаси йил, ваъда бераман, Худо хоҳласа шундай жамоа қиламизки, “Андижон” чемпион бўлади”, деганди ҳоким бува клуб мухлисларига.

Маълумот учун, жорий мавсум бошида ҳам “Андижон” жамоаси мавсумда чемпионлик учун курашишини маълум қилиб, бош мураббийлик лавозимига Санвел Бабаянни олиб келганди. Бироқ кетма-кет мағлубиятлардан сўнг мутахассис 9 турдан сўнг истеъфога чиқарилди. Ҳозирда “бургутлар” Ислом Аҳмедов қўл остида Суперлига турнир жадвалида 30 очко жамғарган ҳолда 8-ўринда бормоқда.