Ароқчи Туркияда қулаган ракетанинг Эронга алоқаси йўқлигини айтди
Олам
−
16:34 1978 1 дақиқа
Бугун, 10 март куни Туркия Ташқи ишлар вазири Ҳоқон Фидан Эрон Ташқи ишлар вазири Аббос Ароқчи билан телефон орқали мулоқот қилди. Бу ҳақда TRT Haber хабар берди.
Маълум қилинишича, Ҳоқон Фидан суҳбат давомида Туркия ҳаво ҳудудининг бузилиши қабул қилинмаслигини айтиб, Туркия бунга қарши барча зарур чораларни давом эттиришини билдирган. Шунингдек, Фидан барча томонлар минтақавий хавфсизликни хавф остига қўйиши ва фуқароларга хавф туғдириши мумкин бўлган ҳаракатлардан тийилиши кераклигини таъкидлаган.
Вазир Ароқчи эса Туркия ҳаво ҳудудига йўналтирилган ракеталар Эронга алоқаси йўқлигини ва бу масала бўйича кенг қамровли текширув ўтказилишини маълум қилган.
Қайд этиш жоиз, олдинроқ Туркия осмонида Эрондан учирилган баллистик ракета йўқ қилинганди. Шундан сўнг Эрон Президенти Масъуд Пезешкиён қўшниларидан узр сўради ва ҳужумларни тўхтатишга ваъда берди.
Туркия Ташқи ишлар вазири Ҳоқон Фидан эса Эронни кескин огоҳлантирган эди.
Кейинроқ Эрондан яна бир марта Туркия томонга баллистик ракета йўналтирилди. Туркия Президенти Ражаб Тойиб Эрдўған ҳолат юзасидан муносабат билдириб, Теҳронни хато қилишдан тийилишга ва қайсарлик қилмасликка чақирди.
