Hindistonda 200 dan ortiq yo‘lovchisi bor samolyot quladi (video)

Bugun, 12 iyun kuni Hindistonning Gujarat shtatidagi Ahmadobod shahrida Air India aviakompaniyasiga tegishli Boeing 787-8 Dreamliner samolyoti halokatga uchradi. Bu haqda “Times of India” xabar berdi.

AI171 raqamli reys mahalliy vaqt bilan soat 13:38 da Ahmadoboddagi Sardar Vallabhbhai Patel xalqaro aeroportidan Londonga yo‘lga chiqqan. Ammo parvoz boshlanganidan atigi bir necha daqiqa o‘tib, samolyot favqulodda holat signalini bergan va qisqa muddatdan so‘ng aloqalar uzilgan. Samolyot aeroportdan uncha uzoq bo‘lmagan hududga qulab tushgan. Hodisa joyidan olingan kadrlarda qalin qora tutun osmonga ko‘tarilayotgani va yong‘in yuzaga kelgani ko‘rinadi. 

Samolyot bortida jami 242 kishi bo‘lgani ma’lum qilindi, ulardan 2 nafar uchuvchi, 10 nafar ekipaj a’zosi va 230 yo‘lovchi bo‘lgan. Halokat yuz bergan hududda yong‘in xavfsizligi xizmatlari, politsiya va favqulodda vaziyatlarga javob beruvchi guruhlar zudlik bilan ish olib bormoqda. Gujarat shtati va Hindiston Markaziy hukumati voqea yuzasidan favqulodda nazorat choralarini ko‘rmoqda. Air India kompaniyasi hodisa tafsilotlari hali aniqlanayotganini va rasmiy tergov boshlanganini tasdiqlagan.

Hozircha halokat sababi va jabrlanganlar soni rasman e’lon qilinmagan. Hindiston fuqaro aviatsiyasi boshqarmasi  va Air India voqea bo‘yicha tergov ishlarini olib bormoqda. Ayrim mahalliy manbalarda havo sharoiti, texnik nosozlik yoki boshqa omillar mumkinligi taxmin qilinmoqda. Halokat yuz bergan hududda yashovchi aholining xavfsizligi bo‘yicha ham hozircha rasmiy ma’lumotlar berilmagan.

Eslatib o‘tamiz, o‘tgan yilning 25 dekabr kuni Azerbaijan Airlines aviakompaniyasining Baku-Grozniy yo‘nalishidagi samolyoti halokatga uchragandi. Samolyotda 62 nafar yo‘lovchi va besh nafar ekipaj a’zosi bo‘lgan. Samolyot qulashida 38 kishi halok bo‘ldi, 29 kishi omon qoldi.