Ҳиндистон биринчи космик машқларни ўтказди

Ҳиндистон илк бор “Antariksha Abhyas – 2024” деб номланган космик машқларини ўтказди. Бу ҳақда республика Мудофаа вазирлиги хабар берди.

Билдирилишича, машқлар мамлакат Қуролли кучларининг коинотда жанговар ҳаракатларни амалга оширишга тайёрлигини оширишга қаратилган.

Вазирлик маълумотларига кўра, уч кунлик машғулотлардан кўзланган мақсад – “космик активлар ва хизматларни чуқурроқ тушуниш ва манфаатдор томонларнинг космик сегментларга боғлиқлиги ҳақида тушунчага эга бўлиш”, шунингдек, “космик хизматлардан воз кечиш ёки операциялар пайтида уларнинг ишлашида узилишлар юзага келадиган” заифликларни аниқлаш.

“Antariksha Abhyas – 2024” (ҳинд тилидан “Ер устидаги осмондаги машқ” деб таржима қилинган)да Ҳиндистон мудофаа космик агентлиги ва унинг бўлинмалари вакиллари, шунингдек, Ҳиндистон ҳаво кучлари, қуруқликдаги кучлари ва денгиз флотининг ҳарбий хизматчилари иштирок этди. Машғулотлар доирасида энг янги космик технологиялар, шунингдек, Ҳиндистон космик дастурлари бўйича мунозаралар ўтказилди.

Ҳиндистон мудофаа штаби бошлиғи генерал Анил Чауханнинг сўзларига кўра, “бир пайтлар охирги чегара ҳисобланган космос ҳозир Ҳиндистоннинг энг муҳим мудофаа ва хавфсизликни таъминловчи омили”.

“Космосни тадқиқ қилишда бой мероси ва ортиб бораётган ҳарбий салоҳияти билан Ҳиндистон космик имкониятлардан келиб чиқадиган муаммоларни ҳал қилиш учун яхши позицияга эга”, деб таъкидлади у.

Чаухан космос тобора тирбанд, рақобатбардош ва тижорат майдонига айланиб бораётганини тан олди, бу эса у ерда инновацияларни қўллаб-қувватлаш, илғор технологиялар ва замонавий тизимларни ишлаб чиқиш орқали Ҳиндистоннинг миллий манфаатларини таъминлаш муҳимлигини таъкидлади.