Ҳаррис президентликка номзодини қўймоқчи

АҚШнинг собиқ вице-президенти Камала Ҳаррис келгуси сайловларда АҚШ президентлигига номзодини қўйиши мумкин. Бу ҳақда у BBC’га берган интервьюсида сўз очди.

Ҳарриснинг сўзларига кўра, у ўтган йили АҚШ Президенти Доналъд Трампга мағлуб бўлганидан кейин 2028 йилда яна президентликка номзодини қўйиши мумкин ва келажакда аёл раҳбар Оқ уйда фаолият олиб боришига ишончи комил.

Шунингдек, Ҳаррис навбатдаги юқори лавозимда фаолиятини бошлаш ҳақида ўйлаб кўраётганини айтиб, унинг авлодлари келажакда Оқ уйда аёл президентнинг фаолиятига гувоҳ бўлишини таъкидлаган.

“Мен ҳали ўйинни тугатмадим. Бутун ҳаётимни давлатга хизмат қилишга бағишладим ва бу менинг суякларимгача сингиб кетган”, дейди собиқ вице-президент.

Ҳаррис Демократлар партиясидан номзодлар рўйхатида ғолиб чиқиш эҳтимоли паст деб баҳоланаётгани юзасидан муносабат билдириб, бундай сўровномаларга аҳамият бермаслигини айтган.

“Мен ҳеч қачон сўровномаларга қулоқ тутмаганман. Агар уларга аҳамият берганимда , биринчи лавозим учун ҳам, иккинчиси учун ҳам номзодимни қўймас эдим ва ҳозир бу ерда ўтирмас эдим”, дейди Ҳаррис.

Ҳаррис, шунингдек, Доналъд Трампнинг “авторитар бошқарув” олиб бориши ҳақида ўз тахминлари амалга ошганини билдирган.

“Трамп Адлия вазирлигини сиёсий воситага айлантиришини айтган эди ва айнан шундай бўлди”, дейди у.

Интервью давомида собиқ вице-президент АҚШда фаолият олиб бораётган бизнес раҳбарлари ва институтларни танқид қилиб, улар Трампнинг талабларига жуда осон бўйсунганини қоралаган.

“Трампга тезда бўйсунганлар ва золимнинг оёғига тиззасини букканлар жуда кўп, улар ҳокимият ёнида бўлиб, бирлашишдан ва терговдан қочишни хоҳлайди”, деган Камала Ҳаррис.

Эслатиб ўтамиз, аввалроқ АҚШнинг Лос-Анжелес полицияси ходимлари жамоатчилик норозилигидан кейин собиқ вице-президент ва Демократик партиядан президентликка собиқ номзод Камала Ҳарриснинг хавфсизлигини таъминлашни тўхтатган эди.

Бунёд Келдибоев