Hamster Kombat “эпидемияси”: вақтми ё пул?

Ўзбекистон аҳолиси тобора кўпроқ дўстларининг иловага кириши ва ҳамстер тасвирини босиш сўровларига дуч келишмоқда. Аҳоли орасида трендга чиқиб бораётган бу веб-ўйин Hamster Kombat бўлиб, ишлаб чиқувчилар ундан пул ишлаш мумкинлигини таъкидламоқда.

Ўйин оддий механизмга асосланган бўлиб: ўйинчилар виртуал тангаларни олиш учун ҳамстер тасвирини босиши керак бўлади. Ўйинчи қанча кўп пул топса, ҳамстерга шунчалик ҳашаматли кийим сотиб олиши мумкин. Ўйин сюжетига кўра, ҳамстер крипто биржасининг менежери бўлиб, бойиб кетишга интилади.

Ҳозирда илованинг Telegram-каналида 40 миллион обуначи бор.

Хўш, 7 ёшдан 70 ёшгача бўлган одамлар бу ўйинга бир кунда ўртача қанча вақт сарфламоқда? Ушбу ўйиндан фойда олганлар борми? Буларни аҳоли орасида ўтказилган сўровнома орқали билиб оламиз.

Суҳбат асносида Hamster Kombat ўйини билан қанчалик таниш эканлиги ҳақидаги саволга жавобан респондентларнинг катта қисми бу ўйиндан хабари борлиги, ўзлари ҳам ўйнашини айтди. Қолган қисми ушбу ўйин ҳақида дўстларининг Telegram’дан ҳавола юбориб, ундан рўйҳатдан ўтишини сўраши орқали хабар топганини айтишди.

“Ҳа, биламан, бу – Hamster Kombat ўйини. Дўстларим Telegram’дан ҳавола жўнатди, мен шу ҳавола орқали кириб ўйнашни бошладим”, дейди иштирокчилардан бири.

Яна бир суҳбатдошимиз эса бу каби ўйинлар чиққан вақтида қизиқмаганини, бироқ дўстлари пул топаётганини эшитгач ўйнашни бошлаганини айтди.

“Дастлаб ноткоин чиққан вақтда қизиқмадим, лекин курсдошларим, дўстларим яхшигина пул топишди, 1000 доллар топиб , Iphone олганлар ҳам бўлди”, дейди у.

Лекин, иштирокчилар орасида бу ўйинни билмайдиган, билса ҳам зарарли деб ҳисоблайдиганлар бор.

“Бу фойдали нарса эмас, бу менинг шахсий фикрим! Менимча, биткоин, ноткоинда майнинг қилишади, уларнинг ноқонуний майнинги ҳамда аппаратлари бор. Hamster Kombat’нинг ҳозирда 45 миллионга яқин обуначиси мавжуд, улар шу орқали биткоинга ўхшаш янги криптовалютани олиб киришмоқчи”, дейди респондентлардан бири.

Шунингдек, бир кунда бу ўйинга қанча вақт сарфлаши ҳақидаги саволга жавобан респондентларнинг кўпи ўртача 1-2 соат вақти кетишини айтди.

Иштирокчилар орасида бу ўйин вақт олмаслигини, ҳамстер тасвирини босиб туриш учун илова юклаб олганини айтди.

“Ҳеч қанча вақтим кетмайди, босиб турадиган илова юклаб олганман”, дейди у.

Респондентлардан бири бир кунда бу ўйинга ўртача 5-6 соат вақти кетишини айтди.

“Ҳар кирганимда ярим соатдан бир кунда ўртача 5-6 соат кетябди”, дейди аҳоли вакилларидан бири.

Айримларнинг айтишича, Hamster Kombat ўйини ҳали биржага чиқмаган, шу сабабли улар бу ўйиндан ҳали фойда олишгани йўқ, бироқ шунга ўхшаш криптовалюталарни сотиш орқали 100 минг сўмдан бошлаб 1000 долларгача фойда олишган.

“Hamster Kombat'дан фойда олганим йўқ, бироқ шунга ўхшаш ўйиндан 68 доллар олганман”, дейди иштирокчилардан бири.

Сиз-чи? Сиз бу ўйинга бир кунда ўртача қанча вақт сарфлайсиз? Шу каби ўйинлардан фойда олганмисиз?