ҲАМАС Исроилга гаровга олинган 4 кишининг жасадини топширди

Аввалроқ, Исроил ва ҲАМАС ҳаракати Исроил томонига гаровга олинган яна тўрт кишининг жасадини топшириш ва шу вақтнинг ўзида 602 нафар фаластинлик маҳбусни озод қилишга келишиб олганди. Шу келишув доирасида ҲАМАС гаровга олинган тўрт нафар исроилликнинг жасадларини Қизил Хочга топширди. Бу ҳақда бугун, 27 февраль куни “Associated Press” агентлиги Исроил хавфсизлик хизматларига таяниб, хабар берди.

Маълум қилинишича, тобутлар “Керем-Шалом” назорат-ўтказиш пункти орқали Исроил мудофаа армиясига (ЦАХАЛ) топширилади. Исроил уларни чегарага яқин ҳудудда аниқлаш жараёнидан ўтказиб, келишувда қайд этилган гаровга олинган шахсларнинг айнан ўзи эканига ишонч ҳосил қилмоқчи.

“The Times of Israel” нашрига кўра, Исроил томонига 69 ёшли Нир-Оз кибуцида яшаган Ицик Элгарат, 49 ёшли Цахи Идан, 85 ёшли Шломо Мансур ва яна бир собиқ гаровга олинганнинг жасадлари топширилиши керак. Нашрнинг ёзишича, Мансур ҲАМАС томонидан гаровга олинган исроилликларнинг энг ёши каттаси бўлган. Тахминларга кўра, у 2023 йил 7 октябрь куни ҳужум пайтида ўлдирилган ва жасади Ғазо секторига олиб кетилган.

AFP агентлиги маълумотларига кўра, Исроил қамоқхоналаридан озод қилиниши келишувнинг бир қисми бўлган фаластинлик маҳбусларни олиб кетаётган автобус Рамаллоҳ шаҳрига етиб борган. У ерда уларни кўплаб фаластинликлар кутиб олган.

Эслатиб ўтамиз, жорий йилнинг 20 февраль куни ҲАМАС 2023 йил 7 октябрь куни Исроилга ҳужум чоғида гаровга олинган 4 кишининг жасадини Исроилга қайтарганди. Орадан бироз вақт ўтиб, Исроил армияси ҲАМАС томонидан топширилган жасадлардан бири гаровга олинган Шири Бибас эмас, балки номаълум шахсга тегишли эканини маълум қилганди. Исроил қабул қилинган жасадларни Миллий суд-тиббиёт марказига юборган. Текширувларда жасадлардан бири номаълум ва Шири Бибасга тегишли эмаслиги аниқланган. Болаларнинг ДНК намуналари қайтарилган аёлники билан мос келмаган.  21 февраль куни ҲАМАС ҳаракати янглишилган жасадни Халқаро Қизил Хоч қўмитасига топширди.