Трамп Россия нефтига қарши санкцияларни қайта тикламоқчи

АҚШ Президенти Дональд Трамп Эрон билан тинчлик келишуви имзоланиши ва Ҳормуз бўғози очилиши фонида Россия нефтига нисбатан санкцияларни қайта тиклашни режалаштираётганини маълум қилди. Бу ҳақда “The Guardian” хабар берди.

“Яқин орада буни амалга оширишимиз мумкин, чунки ҳозир Форс кўрфазидан нефть етказиб берилмоқда. Биз санкцияларни олиб ташлагандик, чунки нефть таъминотига тўсқинлик қилишни истамагандик. Шундай экан, яқин орада бунга имконият пайдо бўлади”, деган Трамп.

АҚШ март ойи ўрталарида денгиз орқали ташиладиган Россия нефтига қўйилган чекловларнинг бир қисмини вақтинча юмшатган эди. Бунга жаҳон бозорида ёқилғи танқислиги юзага келгани сабаб қилиб кўрсатилган. Дастлаб имтиёз 30 кунга берилган, кейинчалик эса икки марта яна бир ойдан узайтирилган. Ҳозир амалда бўлган истисно муддати 18 июнда якунланади.

АҚШ ва Эрон 19 июнь куни Швейцариянинг Женева шаҳрида ўт очишни тўхтатиш бўйича келишувни имзолаши кутилмоқда. Келишув 60 кунлик сулҳ ва Ҳурмуз бўғозининг очилишини назарда тутади, бироқ унинг барча тафсилотлари ҳозирча ошкор қилинмаган.

Трамп Эрон билан келишувга эришилганидан сўнг, энди Россия ва Украина ўртасидаги урушни ҳал қилиш бўйича саъй-ҳаракатларни яна кучайтиришини ҳам билдирган.

Эслатиб ўтамиз, аввалроқ Европа комиссияси Россияга қарши энг йирик 21-санкциялар пакети доирасида 170 дан ортиқ янги чеклов жорий этишни таклиф қилганди.