АҚШда йирик авиаҳалокат: ўндан ортиқ қурбон бор (видео)

Кеча, 14 июнь куни АҚШнинг Миссури штатида содир бўлган авиаҳалокат оқибатида 11 нафар парашютчи ва 1 учувчи ҳалок бўлди. Бу ҳақда Fox “News” хабар берди.

АҚШ Федерал авиация бошқармаси баёнотига кўра, Pacific Aerospace P750 самолёти Миссури штатидаги Батлер-Мемориал аэропортидан учиш вақтида ҳалокатга учраган. Ҳодиса содир бўлган вақтда ҳаво ҳаракатини бошқариш хизмати кўрсатилмаётган бўлган.

Бейтс округи фавқулодда вазиятлар бошқармасининг маълум қилишича, хусусий самолёт ҳавога кўтарилганидан кўп ўтмай, номаълум сабабларга кўра ортига қайрилган ва аэропорт яқинига қулаган.

Қулаганидан сўнг самолёт тўлиқ олов ичида қолган, бироқ фавқулодда хизматлар ходимлари ёнғинни тез фурсатда ўчиришга муваффақ бўлган. Самолётда двигатель билан боғлиқ муаммолар юзага келганлиги ёки қувват йўқотилганлиги тахмин қилинмоқда.

Эслатиб ўтамиз, аввалроқ АҚШнинг Техас штатида пиклбол жамоасини олиб кетаётган енгил самолёт ҳалокатга учраган эди. Ўшанда ҳалокат оқибатида беш киши ҳалок бўлган.