Бразилиядаги вертолётлар тўқнашувида машҳур қўшиқчи ҳалок бўлди (видео)

Бразилиянинг Рио-де-Жанейро шаҳрида ҳавода икки вертолёт тўқнашиб кетиши оқибатида олти киши ҳалок бўлди. Қурбонлар орасида америкалик қўшиқчи ва қўшиқлар муаллифи Оливер Три ҳам бор. Бу ҳақда “Sky News” хабар берди.

Маълумотларга кўра, Оливер Три жаҳон гастрол сафари доирасида Бразилияда бўлган. Ҳодиса Рио-де-Жанейронинг Рекрейу-дус-Бандейрантес туманида содир бўлган. Вертолётларнинг бирида беш киши, иккинчисида эса учувчи бўлган. Тўқнашув оқибатида бортдаги барча инсонлар ҳалок бўлган.

Қурбонлар орасида бразилиялик мусиқа продюсери, аргентиналик видеорежиссёр ҳамда YouTube блогери Гаспар Прим ҳам бор.

Тўқнашувдан сўнг вертолётлар электромобиллар автосалони автотураргоҳига қулаган ва оқибатда 20 га яқин автомобил ёниб кетган.

Маҳаллий расмийлар ҳодиса сабабларини аниқлаш бўйича тергов бошлаган. Кучли ёнғин сабаб қурбонларнинг жасадларини аниқлаш жараёни мураккаблашгани маълум қилинди.

32 ёшли Оливер Три Life Goes On, Miss You ва Alien Boy каби машҳур қўшиқлари билан танилган. Унинг ижодини Spotify платформасида ҳар ой 11 миллиондан ортиқ тингловчи кузатиб боради.

Эслатиб ўтамиз, аввалроқ Буюк Британия Қироллик ҳарбий-денгиз кучларига қарашли вертолёт Англиянинг жануби-ғарбидаги Девон графлигида ҳалокатга учраган эди.