Табрикдан ташрифгача: Трамп Путин ва Зеленский билан телефон орқали гаплашди

АҚШ Президенти Дональд Трамп бугун, 15 июнь куни Россия Президенти Владимир Путин ва Украина Президенти Владимир Зеленский билан алоҳида телефон суҳбатлари ўтказди. Бу ҳақда Кремль матбуот хизмати хабар берди.

Кремль ёрдамчиси Юрий Ушаковнинг маълум қилишича, Трамп ва Путин ўртасидаги суҳбат 55 дақиқа давом этган. Томонлар АҚШ ва Россия муносабатлари, шунингдек, Эрон билан боғлиқ вазият ҳамда можаронинг эҳтимолий якунланишини муҳокама қилган.

Ушаковга кўра, Трамп Россия—Украина урушини тугатиш тарафдори эканини билдириб, яқинлашиб келаётган G7 саммити доирасида Киев ва Европа давлатларига таъсир ўтказишга тайёрлигини айтган.

Путин эса Россия ҳудудидаги фуқаролик инфратузилмасига уюштирилаётган ҳужумлар можарони ҳал этишга тўсқинлик қилаётганини таъкидлаган. Шунингдек, у G7 саммитида Европа етакчилари ва Зеленский урушни давом эттиришга хизмат қиладиган таклифларни илгари суриши мумкинлигини билдирган.

Ушаковнинг айтишича, Путин ва Трамп суҳбатида АҚШнинг махсус вакиллари Стив Уиткофф ҳамда Жаред Кушнернинг яқин кунларда Москвага ташрифи масаласи ҳам келишиб олинган.

Шу билан бирга, Украина Президенти Владимир Зеленский ҳам Трамп билан телефон орқали гаплашганини маълум қилган. У АҚШ етакчисини 80 йиллик юбилейи билан табриклаган ҳамда томонлар тинчликка эришиш йўллари, фронтдаги вазият ва келгусидаги дипломатик қадамларни муҳокама қилганини айтган.

Зеленскийнинг сўзларига кўра, у Трамп билан G7 саммити доирасида учрашув ўтказишга келишиб олган. Ҳозирча бу икки томонлама учрашув бўладими ёки саммит доирасидаги музокаралар шаклида ўтадими, аниқ эмас.

Эслатиб ўтамиз, аввалроқ Ўзбекистон Республикаси Президенти Шавкат Мирзиёев Америка Қўшма Штатлари Президенти Дональд Трампга таваллуд куни – юбилей айёми муносабати билан табрик йўллаган эди.