Путин айтилмаган жойга бормайди – Песков

Россия Президенти матбуот котиби Дмитрий Песков Владимир Путин Украина Президенти Владимир Зеленскийдан G7 саммити доирасида учрашув ўтказиш бўйича расмий таклиф олмаганини маълум қилди. Бу ҳақда у матбуот анжуманида айтди.

“Албатта, бундай таклиф бўлгани йўқ. Биласиз, Москва ва Киев ўртасида расмий алоқа каналлари ҳам мавжуд эмас”, деган Песков.

Кремль вакилига кўра, Путин томонидан Зеленскийга барча зарур фикрлар айтилган, таклифлар билдирилган ва бир неча бор такрорланган.

“Агар Зеленский масъулият билан ва жиддий мулоқот қилишга тайёр бўлса, Киев режими нима ҳақида гап кетишини яхши билади. У ҳар доим Москвага келиши мумкин, у ерда уни қабул қилишади”, деб қўшимча қилган Песков.

15 июнь куни Зеленский Францияда бошланган G7 саммити доирасида Путинга учрашув таклиф қилганини маълум қилган эди. Унинг сўзларига кўра, таклиф Россия томонига етказилган, бироқ ҳозиргача жавоб келмаган.
Зеленский, шунингдек, мазкур ташаббус ҳақида АҚШ Президенти Дональд Трамп ва Франция Президенти Эммануэль Макрон ҳам хабардор қилинганини айтган.

Эслатиб ўтамиз, 4 июнь куни Зеленский Путинга очиқ мактуб йўллаб, шахсий учрашувнинг аниқ санасини белгилашни таклиф қилган эди. У музокаралар Швейцария, Туркия ёки араб давлатларидан бирида ўтказилиши мумкинлигини билдирган.

5 июнь куни эса АҚШ Президенти Дональд Трамп Путин ва Зеленскийнинг тўғридан-тўғри учрашувини ижобий қадам деб баҳолаган. Ўша куни Путин эса ҳозирча Украина раҳбари билан шахсан учрашиш учун сабаб кўрмаётганини билдирган эди. Песковнинг таъкидлашича, Зеленский учрашув таклифини очиқ хат шаклида эълон қилиш ўрнига бошқа дипломатик йўллар орқали ҳам етказиши мумкин эди.