Туркиялик машхур хонанда ва сериал актрисалари гиёҳвандликда айбланиб қўлга олинди

Туркиянинг Истанбул шаҳрида 11 июнь куни кино ва шоу-бизнес вакиллари орасида гиёҳванд моддаларни истеъмол қилиш, сақлаш ва тарқатиш ҳолатлари бўйича олиб борилаётган тергов доирасида навбатдаги йирик махсус операция ўтказилди. Бу ҳақда NTV телеканали хабар қилди.

Маълум қилинишича, операция давомида жами 22 нафар шахс қўлга олинган. Қўлга олинганлар орасида Туркиянинг машҳур поп хонандаларидан бири Кенан Доғулу ҳамда “Тақиқланган муҳаббат”, “Фотмагулнинг айби нима?” ва “Муҳташам юз йил”, “Кўсем салтанати” сериалларидаги бош роллари билан танилган актриса Берен Саат ҳам бор.

Шунингдек, полиция бўлимига “Ойна ортидаги қиз” ва “Қўриқчи фаришта” сериаллари орқали машҳурликка эришган актёр Енис Арикан, шунингдек блогер ва диджей Керимжан Дурмаз ҳам олиб кетилган.

Қайд этилишича, Туркияда сўнгги бир неча ой давомида гиёҳвандликка қарши кенг кўламли операциялар мунтазам ўтказилмоқда. Аввалроқ ҳам ўнлаб шахслар, жумладан таниқли актёрлар, тележурналистлар ва блогерлар қўлга олинган.

Шу билан бирга, 2026 йилнинг февраль ойида эса Истанбул суди Босфор соҳилида жойлашган беш юлдузли “Бебек” меҳмонхонасини хатловга олган. Полиция маълумотларига кўра, ушбу меҳмонхонада маҳаллий элита вакиллари иштирокида гиёҳванд моддалар истеъмол қилинган базм кечалари ўтказиб келинган.

Эслатиб ўтамиз, аввалроқ кўплаб машҳур фильмлари орқали Ўзбекистонда ҳам танилган туркиялик актёр ва модель Бурак Денизнинг тест учун топширган соч ва қон намуналаридан гиёҳванд моддалар топилган эди.