Сурхондарёда поезд чиптачиси йўловчи аёлга тегажоғлик қилди

Сурхондарё вилоятида Ўзбекистон темир йўллари чиптачиси йўловчи аёлга шаҳвоний шилқимлик қилгани учун 5 суткага қамалди. QALAMPIR.UZ суд ҳужжати билан танишди.

Ҳужжатда келтирилишича, 38 ёшли судланувчи М.Д. жорий йилнинг 1 июнь куни соат 22:15 ларда “Сариосиё-Термиз” йўналишидаги йўловчи поездида М.Х. га нисбатан тегажоғлик ва шилқимлик қилган.

Мазкур иш жорий йилнинг 9 июнь куни Жиноят ишлари бўйича Шўрчи туман судида кўриб чиқилган. Суд мажлисида М.Д. айбига иқрор бўлган. Унинг айтишича, ҳақиқатдан ҳам 1 июнь куни соат 22:15 ларда “Сариосиё-Термиз” йўналишидаги йўловчи поездида Узун туманида яшовчи М.Х. нинг белидан қучоқлаб олган ва кейинги бекатда тушишини, чипта пулини ҳам тўлашини айтган. Судда эркак қилмишидан чин кўнгилдан пушаймонлигини билдириб, қонуний енгиллик беришни сўраган.

Суд мажлисида жабрланувчи М.Х. ҳам ҳолатни тасдиқлаб, эркакка нисбатан қонуний чора кўришни сўраган. Шу тариқа, суд қарори билан М.Д. га нисбатан Маъмурий жавобгарлик тўғрисидаги кодекснинг 41-1 -моддаси (шаҳвоний шилқимлик қилиш) билан 5 сутка маъмурий қамоқ жазоси тайинланган.

Эслатиб ўтамиз, аввалроқ Тошкент шаҳрида амалиётчи талабаларга шаҳвоний шилқимлик қилган 32 ёшли уролог-шифокор 5 суткага қамалганди.