Америкаликлар Трампни Эпштейн мижозларини яшираётганликда айблади

Америкаликларнинг аксарияти Дональд Трамп маъмурияти Жеффри Эпштейн билан боғлиқ ишлар бўйича адолатли чоралар кўрилганига ишонмайди. Бу ҳақда “Reuters” нашри хабар берди.

Олти кун давом этган ва жорий йилнинг 8 июнь куни якунланган “Reuters/Ipsos” сўровига кўра, иштирокчиларнинг фақат 10 фоизи Трамп маъмурияти Эпштейн билан боғлиқ шахсларни жавобгарликка тортиш ишларига ёрдам берган деб ҳисоблаган. Шунингдек, респондентлар орасидаги республикачиларнинг ҳам фақат 21 фоизи Трамп маъмурияти адолат қарор топишига ҳисса қўшган деган фикрни билдирган.

Сўров натижаларига кўра, респондентларнинг 84 фоизи, жумладан, республикачилар, демократлар ва мустақил сайловчиларнинг деярли бир хил улуши Эпштейн ҳужжатларида номи зикр этилган АҚШнинг нуфузли одамлари камдан кам ҳолларда жавобгарликка тортилган деб ҳисоблайган.

Шунингдек, америкаликларнинг тўртдан уч қисми федерал ҳукумат Эпштейннинг эҳтимолий мижозлари ҳақидаги маълумотларни ҳали ҳам яшираётган бўлиши мумкин деган фикрни билдирган. Натижалар Конгресс терговчилари Жеффри Эпштейнга оид эҳтимолий жиноятларни ўрганишда давом этаётган бир пайтда эълон қилинган.

Маълумот учун, Эпштейн 2008 йилда вояга етмаган қизлардан фоҳишалик мақсадида фойдаланиш каби айбловлар бўйича айбини тан олган ва қамалган эди. У 2019 йилда Манхэттен қамоқхонасида вафот этган. Эпштейн қурбонларининг айримлари расмий терговлар давомида бой ва нуфузли шахслар ҳимоя қилинганини даъво қилиб келади.

Трамп маъмурияти январь ойида Адлия вазирлигининг миллионлаб тергов ҳужжатларини эълон қилиб, ушбу иш атрофидаги муҳокамаларни яна кучайтирган. Ҳужжатларда бизнес ва давлат бошқарувидаги ўнлаб нуфузли шахсларнинг исмлари ёки суратлари келтирилган бўлиб, улар орасида Дональд Трампнинг ўзи ҳам бор эди.

Ҳужжатларда исмлари тилга олинган бир қатор компания раҳбарлари бу йил ўз лавозимларини тарк этган, аммо улардан ҳеч бирига жиноий айблов қўйилмаган. Улар қаторида Microsoft асосчиси Билл Гейтс ҳам бор. У бугун, 10 июнь куни Конгресс терговчиларига ёпиқ форматда кўрсатма бериши кутилмоқда.

Бу йил эълон қилинган ҳужжатларга кўра, Эпштейн айбини тан олганидан кейин ҳам Билл Гейтс ва Жеффри Эпштейн бир неча бор учрашиб, Гейтснинг хайрия фаолиятини кенгайтириш масалаларини муҳокама қилган. Гейтснинг хайрия ташкилоти вакили жорий йил февраль ойида миллиардер ходимлар билан учрашувда Эпштейн билан алоқалари бўйича “ўз ҳаракатлари учун масъулиятни зиммасига олганини” билдирган.

Эпштейн можароси Трамп учун узоқ вақтдан бери сиёсий муаммо бўлиб келмоқда. Трамп аввалроқ Эпштейн иши бўйича турли гумонларни қўллаб-қувватлаб келган, кейинчалик эса унинг маъмурияти АҚШ ҳукумати бу иш ҳақида билган барча маълумотларни тўлиқ ошкор қилмаётгани ҳақида танқидларга учраган.

Эслатиб ўтамиз, аввалроқ америкалик молиячи Жеффри Эпштейннинг яна йигирмага яқин эҳтимолий қурбонлари Париж прокуратурасига мурожаат қилгани хабар қилинганди.