OpenAI IPO’га ариза топширди. Компания 1 трлн долларлик баҳо кутяпти

ChatGPT чат-боти асосчиси бўлган Американинг OpenAI компанияси қимматли қоғозларни бирламчи оммавий жойлаштириш (IPO) учун ариза топширди. Бу ҳақда компаниянинг расмий сайтидаги эълонда сўз боради.

“Биз яқинда махфий S-1 шаклини топширдик. Бу маълумот барибир сизиб чиқишини кутган эдик, шунинг учун бу ҳақда ўзимиз расман эълон қилишни лозим топдик. Ҳозирча муддат бўйича бир қарорга келмадик. Бу бироз вақт талаб қилиши мумкин, чунки биз амалга оширишни хоҳлаётган ва хусусий компания бўлиб қолган ҳолда бажариш осонроқ бўлган айрим ишлар бор. Бироқ бу мураккаб муросалар тўпламидир ва бундай қадам, агар якунда энг яхши ечим бўлиб чиқса, биржага эртароқ чиқиш имкониятини беради”, дейилади хабарда.

OpenAI бўлажак IPO’нинг асосий параметрларини, жумладан, компания акцияларни қандай нархда жойлаштиришни режалаштираётгани ва биржага чиқишдан олдин унинг қиймати қанчага баҳоланиши мумкинлигини ҳозирча ошкор қилмаган. Бироқ, “Reuters”нинг ёзишича, сунъий интеллект гиганти сентябрь ойидаёқ бўлиб ўтиши мумкин бўлган биржа дебютида 1 триллион долларгача бўлган баҳога умид қилмоқда.

Аввалроқ, Claude сунъий интеллект ассистенти дастурчиси ва OpenAI’нинг асосий рақобатчиларидан бири бўлган Anthropic компанияси ҳам IPO учун махфий ариза топширган.

“Иккала компания ҳам дата-марказлар қуриш, чиплар сотиб олиш ва мутахассисларни ёллаш учун зарур бўлган капитал пойгаси фонида оммавий бозорга чиқишга интилмоқда”, деб қайд этади “Bloomberg”. 

Экспертларнинг огоҳлантиришича, биринчи бўлиб IPO ўтказган компания сунъий интеллект инфратузилмасини янада ривожлантириш учун инвестицияларни жалб қилишда устунликка эга бўлиши мумкин. 

Эслатиб ўтамиз, аввалроқ Илон Маск ўзига тегишли SpaceX компанияси акцияларининг қийматини оммавий савдога чиқариш арафасида 1,75 триллион доллар деб баҳолагани ва биржадаги акциялар савдоси шу нархда амалга ошса, Маск дунёдаги биринчи триллионерга айланиши мумкинлиги ҳақида хабар берилган эди.