Ироқ футболчиси АҚШ аэропортида 7 соат сўроқ қилинди

Ироқ терма жамоаси ҳужумчиси Айман Ҳусайн АҚШга кириб келганидан сўнг Чикагодаги О‘Хара аэропортида  қарийб етти соат давомида сўроқ қилинган. Бу ҳақда Ироқ спорт расмийларига таяниб, “Reuters” нашри хабар берди.

Маълумотга кўра, текширувдан сўнг футболчига АҚШга киришга рухсат берилган. Бироқ миллий терма жамоа фотографи Талал Салахга мамлакатга кириш тақиқланган.

Манбага кўра, АҚШга етиб келгач, Айман Ҳусайннинг мобил телефони текширилган. Худди шундай текширув фотографга ҳам ўтказилган, у эса миграция хизматлари назорати остида ўн соатдан ортиқ ушлаб турилгach, охир-оқибат АҚШга киритилмаган.

Ҳозирча Ироқ футбол ассоциацияси ҳам, Айман Ҳусайннинг ўзи ҳам воқеага изоҳ бермаган. АҚШнинг Иммиграция ва божхона назорати хизмати ҳамда Ички хавфсизлик вазирлиги журналистлар сўровига жавоб қайтармаган.

Айман Ҳусайн Ироқ терма жамоасининг етакчи футболчиларидан бири ҳисобланади. Айнан унинг голи жамоага жаҳон чемпионатига йўлланма берган. Бу Ироқ учун сўнгги 40 йил ичидаги биринчи мундиал бўлади. Гуруҳ босқичида Ироқ Франция, Сенегал ва Норвегия терма жамоаларига қарши ўйнайди. АҚШ, Канада ва Мексика мезбонлик қилаётган жаҳон чемпионати келаси ҳафтада бошланади.

Эслатиб ўтамиз, аввалроқ Футбол бўйича Эрон миллий терма жамоаси делегациясининг бир қисми, жумладан, мураббийлар штаби аъзолари 2026 йилги Жаҳон чемпионати олдидан АҚШ визаларини ололмагани ҳақида хабар берилганди.