Англия терма жамоасининг буюмларини ўғирлаган шахслар ушланди

АҚШ полицияси Англия терма жамоасининг машғулот базасидан бутса ва тўпларни ўғирлашда гумон қилинаётган икки кишини ҳибсга олди. Бу ҳақда “Goal” нашри хабар берди. 

Аввалроқ, Англия терма жамоасининг Миссури штати Кансас-Сити шаҳрида бўлиб ўтадиган биринчи машғулотидан олдин футболчиларнинг бутсалари, расмий турнир тўплари ва асосий машғулот жиҳозлари ўғирлангани ҳақида маълум қилинган эди.

Манбаларга кўра, юклар орасида фақат битта футбол тўпи қолган, шунингдек, терма жамоанинг етакчи футболчилари Ҳарри Кейн ва Жуд Беллингемнинг бутсалари ҳам йўқолган.

Нашрнинг ёзишича, полиция вакиллари воқеа юзасидан тергов ишлари давом этаётганини билдирган.

Маълумот учун, Англия терма жамоасининг Жаҳон чемпионатидаги илк ўйини жорий йилнинг 17 июнь куни Хорватияга қарши ўтказилади. Томас Тухел бошчилигидаги жамоа кейинчалик Гана (23 июнь) ва Панама (28 июнь) терма жамоаларига қарши майдонга тушади.