Қурилишга рухсат олиш харажати 2 баробаргача камайтирилади

Энди қурилишга рухсат олишда тадбиркорларнинг харажатлари 2 баробаргача қисқартирилади. Бу ҳақда Президент Шавкат Мирзиёевнинг жорий йил 4 июнда имзолаган “Қурилиш соҳасида натижага асосланган бошқарувни жорий этиш ҳамда соҳада давлат хизматларини соддалаштириш чора-тадбирлари тўғрисида”ги фармонида сўз боради.

Фармонга кўра, 2026 йил 1 сентябрдан республиканинг барча ҳудудларида мазкур фармонда назарда тутилган давлат хизматлари бирлаштирилиб, ягона давлат хизмати – архитектура ва шаҳарсозлик талабини бериш тизими жорий этилади. Шу билан бирга, 2026 йил 1 июлдан объектларни муҳандислик-коммуникация тармоқларига улаш “1 та ариза – 1 тўлов – барча уланиш нуқталари” тамойили асосида композит шаклда амалга оширилади.

Бинонинг конструкцияси, мустаҳкамлиги ва ёнғин хавфсизлигига таъсир қилмайдиган, қуввати ва мақсади ўзгармаган ҳолда шаҳарсозлик нормаларига зид бўлмаган лойиҳадаги режавий тузилиш (планировка)да ўзгаришлар мавжуд бўлганда, ушбу бино лойиҳасини шаҳарсозлик экспертизасидан ўтказишда лойиҳа ҳужжатларини ҳудудий кенгашлар билан қайта келишиш амалиёти бекор қилинади. Қурилиш соҳасида давлат хизматларини кўрсатиш жараёнида аниқланган камчиликларни бартараф этиш учун эса қўшимча 5 иш куни берилади.

Бу қоида қурувчилар ва тадбиркорлар учун иш юритишни осонлаштириш ва ортиқча қоғозбозлик (бюрократия)ни йўқотишга қаратилган жуда муҳим енгилликдир. Илгари бино қурилиши ёки реконструкцияси лойиҳасига кичик бир ўзгартириш (масалан, хоналарнинг жойлашувини ўзгартириш) киритилса ҳам, ҳужжатларни қайтадан маҳаллий (ҳудудий) кенгашлар ва ташкилотлар билан келишиш талаб этилар эди. Бу эса жуда кўп вақт ва ортиқча оворагарчиликка сабаб бўлган.

Яна фармонда қайд этилишича, 2026 йил 1 сентябрдан қурилиш объектларини назорат қилишда видеокузатув камераларидан фойдаланиш ҳамда қурилиши янгидан бошланадиган қуйидаги объектларда видеокузатув камераларини мажбурий ўрнатиш чоралари кўрилади:

• тадбиркорлар томонидан қуриладиган кўп квартирали уй-жойлар, III ва IV тоифадаги ижтимоий соҳа, меҳмонхона, туризм, савдо ва саноат объектларида;
• бюджет ҳисобидан қуриладиган қиймати 3 млрд сўмдан юқори бўлган объектларда.

Эслатиб ўтамиз, аввалроқ Президент Шавкат Мирзиёев қурилиш соҳасида бюрократия, коррупция, сансалорлик кўплиги учун қурилишни бошлаш ойлаб, йиллаб чўзилаётгани танқид қилган эди.