Трампни қуруқ қайтарган Си Путин билан 47 саҳифали ҳужжат имзоламоқчи

Россия Президенти Владимир Путиннинг Хитойга ташрифи чоғида томонлар йирик ҳужжатлар пакетини, жумладан, 47 саҳифали қўшма баёнотни имзолашни режалаштирмоқда. Бу ҳақда РБК хабар берди.

Қайд этилишича, Россия Президенти Владимир Путин ва ХХР Раиси Си Цзиньпин Хитойдаги учрашув давомида мамлакатлар ўртасидаги шериклик ва стратегик ҳамкорликни янада мустаҳкамлаш тўғрисида қўшма баёнот имзолайди. Россия Президенти ёрдамчиси Юрий Ушаковнинг сўзларига кўра, гап ҳажми 47 саҳифадан иборат “анчагина салмоқли” ҳужжат ҳақида бормоқда.

Ушаковнинг аниқлик киритишича, ушбу ҳужжат дастурий характерга эга бўлиб, Россия ва Хитой ўртасидаги кенг кўламли масалалар бўйича ҳамкорликни ривожлантириш йўналишларини белгилаб беради.

Бундан ташқари, томонлар кўп қутбли дунёни шакллантириш тўғрисида қўшма декларация қабул қилишни режалаштирмоқда.

Владимир Путиннинг Хитойга ташрифи жорий йилнинг 19-20 май кунлари бўлиб ўтади ва икки мамлакат ўртасидаги Яхши қўшничилик, дўстлик ва ҳамкорлик тўғрисидаги шартноманинг 25 йиллигига бағишланади.

Сафар якунлари бўйича Москва ва Пекин 40 га яқин икки томонлама ҳужжатларни имзолаш ниятида.

Маълумот учун, Россия Президентининг Хитойга бундан аввалги ташрифи 2025 йил август охири – сентябрь бошларида бўлиб ўтган эди. Ўшанда Путин Пекинда Япония таслим бўлганидан кейин Иккинчи жаҳон уруши тугашининг 80 йиллигига бағишланган парадда иштирок этган ҳамда Си Цзиньпин билан музокаралар ўтказган.

Эслатиб ўтамиз, аввалроқ АҚШ Президенти Дональд Трамп Хитойга боргани, бироқ у Пекинни на савдо, на Эрон масаласида жиддий натижаларга эришмасдан тарк этгани ҳақида хабар берилган эди.