Трамп нажот истаб Хитойга йўл олди (видео)

АҚШ Президенти Дональд Трамп Си Цзиньпин билан учрашиш учун Хитой Халқ Республикасига йўл олди. Бу ҳақда “Reuters” нашри хабар қилди.

Трамп ва Си Цзиньпин ўртасида 14-15 май кунларига белгиланган Пекиндаги учрашув катта тантана билан ўтиши режалаштирилган. Халқ йиғинлари залида саммит, “Осмон ибодатхонаси” бўйлаб саёҳат ва давлат зиёфати режалаштирилган. Бироқ, иқтисодий натижалар фақатгина келажакдаги савдони бошқариш механизмлари билан чекланиши мумкин.

Трампга бу сафар Илон Маск (Tesla) ва Тим Кук (Apple) каби йирик тадбиркорлар ҳамроҳлик қилмоқда, аммо делегация таркиби 2017 йилдагига қараганда анча кичик. Трампнинг ўзи савдодан ташқари Тайванга қурол сотиш ва қамоқдаги медиа-магнат Жимми Лай масаласини ҳам кўтармоқчи эканини айтган.

“Ҳозир Хитой билан ишларимиз аъло. Мен уни (Си Цзиньпинни) жуда ҳурмат қиламан ва у ҳам мени ҳурмат қилади деб умид қиламан”, деган АҚШ Президенти.

Манбада таъкидланишича, бир йил аввал АҚШ Президенти Дональд Трамп юқори божхона тарифлари Американинг асосий иқтисодий рақибини тиз чўктиришини башорат қилган эди. Бироқ, энди у Пекинга анча пасайган амбициялар билан йўл олган. Сиёсий таҳлилчиларнинг фикрича, Трампнинг мақсадлари эндиликда фақат ловия, гўшт ва Boeing самолётлари бўйича бир нечта келишувларга эришиш ҳамда Хитойдан халқ ўртасида обрўсизланиб бораётган Эрон урушини ҳал қилишда ёрдам сўраш билан чекланган.

“Ҳозир Трампга Хитой кўпроқ керак. Унга ташқи сиёсий ғалаба зарур. Бу ғалаба унинг нафақат глобал сиёсатни издан чиқарувчи, балки дунёда барқарорликни таъминлашга интилаётган шахс эканини кўрсатиши керак”, деб вазиятни баҳолаган Гонгконг университети профессори, Хитой ташқи сиёсати бўйича мутахассис Алехандро Рейес.

Эрон ва Тайвань: Мураккаб савдо

Трампнинг Эрон билан уруши Яқин Шарқни тартибсизликка улоқтирди ва глобал энергия инқирозини келтириб чиқарди. “Reuters/Ipsos” сўровномасига кўра, америкаликларнинг 60 фоизидан кўпроғи бу урушни ёқламаган. Энди Трамп Хитойдан Теҳронни Вашингтон билан келишишга кўндиришни сўрамоқда. Нашрга кўра, Пекин бунинг эвазига нимадир хоҳлайди ва Си Цзиньпин кун тартибининг энг юқори поғонасида Тайвань масаласидир. Шанхайдаги Фудань университети профессори У Синьбонинг фикрича, Трамп Хитойга аниқ кафолат бериши керак.

“Трамп Тайвань мустақиллигини қўллаб-қувватламаслигини ёки сепаратистик сиёсий кучларни рағбатлантирадиган ҳаракатлар қилмаслигини аниқ билдириши лозим”, деган у.

Ойбек Рустамов