Германиядан чиқарилётган АҚШ ҳарбийлари Польшага жойлаштирилиши мумкин

Президент Дональд Трамп Америка Қўшма Штатлари қўшинларини Германиядан Польшага кўчириши мумкинлигини айтди. Бу ҳақда у журналистларга берган интервьюсида сўз очди.

“Польша бундан мамнун бўлар эди. Бизнинг Польша билан муносабатларимиз жуда яхши. Мен Президент билан ҳам яхши муносабатдаман. Уни жуда яхши кўраман. Шунинг учун бу эҳтимолдан ҳоли эмас”, дейди Трамп 8 май куни журналистларга.

Польша Президенти Кароль Навроцкий жорий йилнинг 6 май куни Польша Германиядан чиқариладиган Америка қўшинларини қабул қилишга тайёрлигини билдирган. У ҳатто Трамп билан шахсан музокара қилиб, ҳарбийларни шарққа юборишни сўрашини айтган.

Польша Мудофаа вазири ва консерватив Польша Халқ партияси раҳбари Владислав Косиняк-Камиш ҳам 9 май куни Трампнинг баёнотларини олқишлаган.

“Польша – Америка иттифоқи хавфсизлигимизнинг асосидир. Польша НАТОнинг шарқий қанотини мустаҳкамлаш ва Европани янада яхшироқ ҳимоя қилиш учун кўпроқ америкалик аскарларни қабул қилишга тайёр”, деб ёзган у X ижтимоий тармоғида.

Маълумот учун, шу ой бошида Пентагон Германиядаги ҳарбий базалардан 5 минг америкалик аскар олиб чиқилишини тасдиқлаган эди. Бу қарор Трампнинг Фридрих Мерц билан Эрон уруши масаласидаги баҳсидан кейин айтган таҳдидини амалга ошириш сифатида баҳоланганди. Трамп кейинчалик Пентагон 5 мингдан ҳам кўпроқ қисқартириш қилиши мумкинлигини айтган.

Эслатиб ўтамиз, аввалроқ Германия Мудофаа вазири Борис Писториус АҚШ Президенти Дональд Трампнинг мамлакатдан 5 мингга яқин америкалик ҳарбийни олиб чиқиб кетиш ҳақидаги қарорига муносабат билдирган эди.

Ойбек Рустамов