Непалда 277 йўловчиси бўлган самолётда ёнғин чиқди (видео)

Бугун, 11 май куни Непал пойтахти Катманду шаҳрида жойлашган Трибхуван халқаро аэропортида Turkish Airlines’га тегишли Airbus A330 самолётида техник носозлик юз берди. Ҳодиса самолёт қўнгандан сўнг такси йўлагида ҳаракатланаётган пайтда содир бўлган. Бу ҳақда “Reuters” хабар берди.

Непал фуқаро авиацияси бошқармасига кўра, самолётнинг орқа ўнг шинасида ёнғин чиққан ва оқибатда тутун пайдо бўлган. Ёнғин тезда ўчирилган, самолёт эса хавфсизлик нуқтаи назаридан махсус техник ҳудудга тортиб олиб борилган. Самолёт бортида бўлган 277 йўловчи ва 11 нафар экипаж аъзоси фавқулодда чиқиш эшиклари орқали эвакуация қилинган. Расмий маълумотларга кўра, ҳодиса оқибатида ҳеч ким жароҳат олмаган.

Turkish Airlines вакили Яҳё Устуннинг маълум қилишича, дастлабки текширувлар тутун гидравлик тизимдаги техник носозлик сабабли юзага келганини кўрсатган. Ҳозирда мутахассислар самолётда тўлиқ техник текширув ишларини олиб бормоқда. Ҳодиса сабабли Трибхуван халқаро аэропорти фаолияти тахминан бир соатга вақтинча тўхтатилган, кейинчалик эса қайта тикланган. Авиакомпания йўловчиларни қайтариш учун қўшимча рейс ташкил этилганини маълум қилган.

Эслатиб ўтамиз, аввалроқ АҚШда йўловчи самолёти учиш-қўниш йўлагида одамни уриб кетиб, унинг ўлимига сабаб бўлган эди.

Моҳина Қудратиллаева