Фарғонада алимент тўламаслик учун аёли ва қизини ўлдирган эркак 19 йилга қамалди

Фарғона вилоятининг Ўзбекистон туманида эркак алимент тўламаслик учун ўз аёли ва 3 ёшли қизчасини ўлдирган эркак қамалди. Бу ҳақда “Замон” хабар берди.

Маълумотларга кўра, 2025 йилнинг 3 ноябрь куни спиртли ичимлик таъсирида қайнотасининг уйига келган фуқаро турмуш ўртоғи билан учрашган. Аёл аввалроқ турмуш ўртоғини алимент ундириш масаласида судга берган ва суд қарорига кўра эркак 15 суткага қамалган.

Қайд этилишича, эркак жазо муддатини ўтаб чиққач, эр-хотин ўртасидаги можаро янада кескинлашган. Тергов маълумотларига кўра, у алимент тўлашдан қутулиш мақсадида вояга етмаган фарзандлари кўз ўнгида чўнтагида олиб келган ошхона пичоғи билан турмуш ўртоғига бир неча маротаба тан жароҳати етказган. Шундан сўнг у 2023 йилда туғилган қизига ҳам пичоқ билан зарба берган.

Зарбалар оқибатида бола воқеа жойида ҳалок бўлган, аёл эса шифохонага олиб кетилаётган вақтда вафот этган. Жиноятни содир этган эркак воқеа жойидан қочиб кетган. 

Жиноят ишлари бўйича Ўзбекистон тумани суди уни Жиноят кодексининг 97-моддаси (қасддан одам ўлдириш) 2-қисми “а”, “в”, “ж”, “и” бандлари билан айбдор деб топиб, 19 йил муддатга озодликдан маҳрум қилган.

Эслатиб ўтамиз, аввлроқ Сирдарё вилоятининг Ширин шаҳарчасида норасмий никоҳдаги аёл эрининг қонуний хотини ва унинг 5 ёшли қизини пичоқлаб ўлдиргани ҳақида хабар берилган эди.