Бектемирда ярим кг синтетик наркотик олиб кетаётган йўловчи ушланди

Тошкент шаҳрининг Бектемир туманида Тошкентга олиб кирилаётган синтетик гиёҳвандлик воситалари аниқланди. Бу ҳақда Ички ишлар вазирлиги хабар берди.

Маълум қилинишича, Тошкент вилоятидан Тошкент шаҳрига ҳаракатланиб келаётган Нексия автомашинаси тўхтатиб текширилган. Жараёнда йўловчининг сумкасидан оқ полиэтилен пакетга ўралган моддалар аниқланган.

Шундан сўнг, ушбу гиёҳвандлик воситалари холислар иштирокида далилий ашё сифатида расмийлаштириб олинган.

Хабарга кўра, ички ишлар ходимлари томонидан тезкор тадбир давом эттирилиб, гумонланувчининг яшаш манзили холислар иштирокида кўздан кечирилган. Натижада, синтетик гиёҳвандлик воситалари, электрон тарози, қадоқлаш учун мўлжалланган зип пакетлар ва бошқа буюмлар топилиб, далилий ашё сифатида олинган.

Қайд этилишича, гумонланувчидан олинган гиёҳвандлик моддаларининг оғирлиги ярим килограммни ташкил қилган.

Ҳозирда ушбу ҳолат юзасидан Жиноят кодексининг 273-моддаси (Гиёвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) билан жиноят иши қўзғатилиб, қамоқ эҳтиёт чораси қўлланилган.

Эслатиб ўтамиз, аввалроқ Қашқадарёда эркак 46 кг “гашиш” билан ушланган эди.

Шаҳзода Шукуруллаева