Кремль Зеленскийнинг Озарбайжонда музокара ўтказиш таклифига изоҳ берди

Расмий Кремль Украина можаросини ҳал қилиш бўйича музокаралар учун Озарбайжонни майдон сифатида кўрмаяпти. Бу ҳақда Россия Президенти матбуот котиби Дмитрий Песков маълум қилди.

“Бу ҳақда ҳозирча гап кетаётгани йўқ”, деган Песков.

Жорий йилнинг 25 апрель куни Украина Президенти Владимир Зеленский Украина ва Россия ўртасида тинчлик музокараларини АҚШ иштирокида Озарбайжонда ўтказишни таклиф қилган эди.

Россия Давлат думаси мудофаа қўмитаси биринчи ўринбосари Алексей Журавлёв Озарбайжонни Украина бўйича уч томонлама музокаралар учун муносиб майдон деб атаган, бироқ ҳозирча нима учун учрашиш ва нималарни муҳокама қилиш кераклиги номаълумлигини қўшимча қилган. Унинг фикрича, томонларнинг позициялари шу қадар фарқлики, дипломатлар уларни умумий нуқтага келтира олмаяпти.

Эслатиб ўтамиз, жорий йилнинг февраль ойида Женевада Украина масаласи бўйича музокаралар ўтказилганди. Музокараларнинг биринчи куни жуда кескин ва таранг муҳитда ўтган. Мулоқот бир нечта форматда – Россия–АҚШ, Россия–Украина ҳамда Россия–АҚШ–Украина уч томонлама шаклда олиб борилган. Кун якунида томонлар музокараларни 18 февраль куни давом эттиришга келишиб олган.