Женевада Украина бўйича келишув жуда кескин ўтди

Кеча, 17 февраль куни Женевада Украина масаласи бўйича музокараларнинг биринчи куни жуда кескин ва таранг муҳитда ўтди. Бу ҳақда музокара гуруҳидаги манбага таяниб, РБК хабар берди.

Манбага кўра, мулоқот бир нечта форматда – Россия–АҚШ, Россия–Украина ҳамда Россия–АҚШ–Украина уч томонлама шаклда олиб борилган. Кун якунида томонлар музокараларни 18 февраль куни давом эттиришга келишиб олган.

Аввалроқ, Россия Президенти матбуот котиби Дмитрй Песков Женевада муҳокама қилинадиган масалалар доираси аввалги Абу Даби раундларига нисбатан кенгроқ бўлишини айтган эди. Жумладан, ҳудудий масала ҳам кўтарилиши мумкинлиги таъкидланган. У, шунингдек, учрашувлар журналистлар учун ёпиқ форматда ўтишини ва биринчи кундан катта янгилик кутмаслик кераклигини билдирган.

Музокаралар арафасида Буюк Британия делегацияси ҳам Женевага келган. Делегацияга мамлакат Бош вазирининг миллий хавфсизлик бўйича маслаҳатчиси бошчилик қилган. Расман Лондон учрашув иштирокчиси сифатида эълон қилинмаган бўлса-да, маълумотларга кўра, Британия вакиллари, шунингдек Германия, Франция ва Италия вакиллари музокараларни кузатиб борган.

Россия Ташқи ишлар вазирлиги келишувлар мустаҳкам бўлиши ва “низонинг илдиз сабабларини бартараф этиши” кераклигини билдирган. Ташқи ишлар вазири ўринбосари Сергей Рябковга кўра, Россия хавфсизлигига асосий таҳдид Европадан келмоқда.

Украина етакчиси Владимир Зеленский эса Женевадаги музокараларнинг биринчи куниёқ Россияга қарши янги санкциялар қўллаш эҳтимолини истисно этмаган. Унинг фикрича, дипломатия “адолат ва куч”га таяниши керак.

Қайд этиш жоиз, Абу Даби музокараларини барча томонлар конструктив деб баҳоланган бўлса-да, асосий ихтилофлар, жумладан ҳудудий масала ҳал этилмаган. Россия Донбассдан Украина қўшинлари чиқиб кетишини талаб қилмоқда.

Эслатиб ўтамиз, Женевада Украианадан ташқари Эрон ва АҚШ ўртасида ҳам музокаралар давом этмоқда. Кеча, 17 февраль куни музокаралардан сўнг Эрон Ташқи ишлар вазири Аббос Ароқчи Женевада ўтган навбатдаги билвосита музокараларда Эрон ва АҚШ ядровий масала бўйича асосий “йўл кўрсатувчи тамойиллар” юзасидан умумий келишувга эришилгани ҳақида хабар берганди.