Мбаппе учун мавсум тугади – ОАВ

Мадриднинг “Реал” клуби ҳужумчиси Килиан Мбаппе жароҳати сабабли 2025/2026 йилги мавсум охиригача бўлган қолган ўйинларда иштирок этмайди. Бу ҳақда “El Chiringuito” хабар берди.

Манбага кўра, Мбаппенинг жароҳати дастлаб кўринганидан анча жиддийроқ бўлиб чиққан. Килиан билан боғлиқ вазият бўйича клубнинг расмий баёноти бугун, 27 апрель куни эълон қилиниши кутилмоқда.

Бунгача Мбаппенинг чап оёғи тизза ости пайларида зўриқиш борлиги маълум бўлган. Француз футболчиси Испания чемпионатининг 32-тури доирасидаги “Бетис”га қарши ўйиннинг (1:1) 81-дақиқасида захирага олинган.

Маълумот учун, Ла Лиганинг жорий мавсумида Мбаппе 28 та учрашувда майдонга тушиб, 24 та гол ва тўртта голли узатмага муаллифлик қилди. Таъкидлаш жоиз, 27 ёшли ҳужумчи февраль ва март ойларида ҳам тиззасидаги муаммолар сабабли бешта ўйинни ўтказиб юборган эди. “Transfermarkt” портали маълумотларига кўра, футболчининг тахминий бозор қиймати 200 миллион еврони ташкил этади.