Нефть инқирози: АҚШ Россия нефтига яна енгилликлар беришга мажбур бўлди

АҚШ Россия нефти ва нефть маҳсулотларини, агар улар танкерларга юкланган бўлса, сотишга доир лицензия муддатини 16 майгача узайтирди. Бу ҳақда АҚШ Молия вазирлиги хабар берди.

Вазирлик сайтида эълон қилинган лицензияга кўра, 2026 йил 17 апрелгача танкер кемаларига юкланган Россия нефти ва нефть маҳсулотларини сотиш, ташиш ва туширишга рухсат берилади. Ушбу рухсат 2026 йил 16 майгача амал қилади. Айнан шу санагача олдиндан юкланган нефть билан боғлиқ операцияларни амалга ошириш мумкин.

Бироқ бу рухсат фақат 17 апрелгача юкланган нефтга тегишли. Агар нефть ёки нефть маҳсулотлари ушбу санадан кейин танкерга юкланган бўлса, у ҳолда уларга бу лицензия амал қилмайди ва улар яна санкциялар доирасида қолади.

Шунингдек, бу лицензия Эрон билан боғлиқ ҳеч қандай операцияга тааллуқли эмас, яъни Эрон ҳукумати, Эрон келиб чиқишидаги маҳсулотлар ёки хизматлар билан боғлиқ ҳар қандай савдо ва молиявий фаолият ҳали ҳам тақиқланган.

Бундан олдин АҚШ Молия вазирлиги томонидан берилган шунга ўхшаш вақтинчалик рухсат мавжуд эди. У 12 мартгача танкерга юкланган Россия нефтига тааллуқли бўлиб, 11 апрелгача амал қилган. Аммо бу лицензия муддати тугагач, дастлаб у узайтирилмади.

15 апрель куни АҚШ Молия вазири Скотт Бессент бундай вақтинчалик рухсатномаларни узайтириш режалаштирилмаётганини айтган эди. Унинг таъкидлашича, илгари берилган лицензиялар Россия ва Эрон нефтини иккиламчи санкцияларсиз сотиб олиш имконини берган, аммо келажакда бундай имтиёзлар бўлмаслиги мумкин.

Эслатиб ўтамиз, аввалроқ Европа Иттифоқи Яқин Шарқдаги энергетик инқироз фонида Россиянинг суюлтирилган табиий газини импорт қилишни оширгани ҳақида хабар берилганди.