Футболчилардан АҚШ визаси учун депозит талаб қилиниши мумкин

2026 йилги Жаҳон чемпионати вақтида айрим мамлакатлар мухлислари ва футболчилари АҚШга кириш учун сайёҳлик визасини олишда 15 минг доллар миқдорида депозит тўлаши талаб қилиниши мумкин. Бу ҳақда “The Athletic” нашри хабар берди.

Маълумотларга кўра, жами 50 та давлат фуқароларига нисбатан виза чекловлари қўлланилади. Уларнинг бештаси – Жазоир, Кабо-Верде, Сенегал, Кот-д’Ивуар ва Тунис – аллақачон 2026 йилги мундиал йўлланмасини қўлга киритган ва АҚШда ўтказиладиган гуруҳ босқичида иштирок этади.

Дастурда FIFA Жаҳон чемпионати каби йирик спорт тадбирлари иштирокчилари учун алоҳида истиснолар қўлланиладими ёки йўқми ҳозирча аниқ эмас. АҚШ Давлат департаменти вакилининг таъкидлашича, барча ариза берувчиларга бир хил тартиб қўлланилади. Агар виза муддати тугашидан олдин мамлакат тарк этилса, тўланган депозит қайтарилади. Шу билан бирга, ҳар бир виза аризаси алоҳида тартибда кўриб чиқилиши қайд этилган. 

Эслатиб ўтамиз, аввалроқ Канаданинг Иммиграция, қочқинлар ва фуқаролик вазирлиги 2026 йилги Жаҳон чемпионати муносабати билан мамлакатга кириш учун топширилаётган виза аризаларини янада қатъий кўриб чиқаётгани ҳақида хабар берилганди.