Термизда картошка кўринишидаги 72 кило “гашиш”ни олиб ўтмоқчи бўлган шахс ушланди

Сурхондарё вилоятининг Термиз туманида картошка кўринишидаги 72 кг наркотик моддани олиб ўтмоқчи бўлган шахс ушланди. Бу ҳақда Давлат хавфсизлик хизмати хабар берди.

Маълум бўлишича, 2001 йилда туғилган фуқаро бошқарувидаги “МАН” русумли юк автотранспорт воситаси Афғонистондан “Термиз-автомобиль йўли” халқаро ўтказиш пунктига кириб келган пайтда Давлат хавфсизлик хизматининг Чегара қўшинлари ва Божхона идоралари ходимлари ҳамкорлигида белгиланган тартибда кўрикдан ўтказилган.

Натижада автомашина юкхонасида картошка маҳсулотлари борлиги маълум бўлган. Ушбу қишлоқ хўжалиги маҳсулотлари синчковлик билан текширилганда эса, уларнинг орасига худди картошка кўринишида ясалган 222 дона бўлакдан иборат, жами 72 кг 300 грамм  “гашиш” моддаси яширилганлиги аниқланиб, процессуал тартибда расмийлаштириб олинган.

Дастлабки маълумотларга кўра, ушбу катта миқдордаги гиёҳвандлик воситалари Россияга олиб кетилаётган бўлган.

Ҳозирда ҳолат юзасидан суриштирув ишлари бошланган.

Эслатиб ўтамиз, аввалроқ Фарғона вилоятида ака-укалардан 4 килограмм 463 грамм “гашиш” гиёҳвандлик моддасини топилганди.