Қатарда вертолёт қулаши оқибатида 7 киши ҳалок бўлди

Кеча, 22 март куни Қатар-Туркия қўшма қўмондонлиги таркибида ўқув фаолиятини олиб бораётган Қатар Қуролли кучларига тегишли вертолёт қулаши оқибатида 7 киши ҳалок бўлди. Бу ҳақда “Anadolu” хабар берди.

Қайд этилишича, ҳодисада вертолётда бўлган 4 нафар Қатар куролли кучлари ходими, 1 нафар Туркия Қуролли кучлари ходими ва 2 нафар ASELSAN техник ходими ҳалок бўлган.

Туркия Миллий Мудофаа вазирлиги Қатар-Туркия Қўшма Қўмондонлиги таркибида ўқув машғулотларини олиб бораётган Қатар Қуролли кучларига тегишли вертолёт техник носозлик сабабли ҳалокатга учраб, денгизга қулагани билдирилган.

“Бошланган қидирув-қутқарув ишлари натижасида вертолёт қолдиқлари ва ходимларимизнинг жасадларига етиб борилди. Ҳалокатда вертолётда бўлган 4 нафар Қатар Қуролли кучлари ходими, 1 нафар Туркия Қуролли кучлари ходими ва 2 нафар ASELSAN техник ходими шаҳид бўлган. Ҳалокатнинг аниқ сабаби Қатар расмийлари томонидан ўтказиладиган текширув натижасида аниқланади.

Ушбу оғир ҳодисада ҳаётдан кўз юмган барча шаҳидларимизга Аллоҳдан раҳмат, оилаларига сабр, Туркия Қуролли кучларига, Қатар Қуролли кучларига, ASELSAN’га, турк халқига ва биродар Қатар халқига ҳамдардлик билдирамиз”, дейилади баёнотда.

Қатар Ички ишлар вазирлиги вертолёт ҳалокатидан кейин олиб борилаётган қидирув-қутқарув ишлари ҳақида баёнот берган. Унда вертолёт техник носозлик сабабли қулагани ва 7 кишидан 6 нафарининг жасади топилгани маълум қилинган.

Шунингдек, қидирув-қутқарув ишлари давомида Қатар Қуролли кучлари аъзоси капитан учувчи Саид Носир Симейҳнинг ҳам ҳалок бўлгани тасдиқланган.

Эслатиб ўтамиз, аввалроқ Air Canada авиакомпаниясига тегишли самолёт Ла-Гуардия аэропортининг учиш-қўниш йўлагида ўт ўчириш машинаси билан тўқнашиб кетганди. Ушбу ҳодиса оқибатида экипаж командири ва иккинчи учувчи ҳалок бўлган.