Прокурорлар Юн Сок Ёль учун 10 йил қамоқ сўради

Бугун, 26 декабрь куни собиқ президент Юн Сок Ёль фаолиятини тергов қилаётган махсус прокуратура жамоаси унга нисбатан 10 йилга озодликдан маҳрум этиш жазосини сўради. Улар Юнни ҳибсга олиш ордери ижросига тўсқинлик қилганликда ҳамда лавозим ваколатларини суиистеъмол қилганликда айбламоқда. Бу ҳақда “The Korea Times” хабар берди.

Қайд этилишича, прокурорлар расмий вазифаларга тўсқинлик қилганлик учун 5 йил, ваколатларни суиистеъмол қилганлик учун 3 йил, расмий ҳужжатларни сохталаштириш ва уларни ноқонуний қўллаганлик учун 2 йил қамоқ жазосини сўрамоқда. Улар Юн давлат институтларидан қонунбузарликларни яшириш ва конституциявий мувозанатни издан чиқариш учун фойдаланганини айтмоқда.

“Судланувчи ўз жиноятларини яшириш учун ваколатларини суиистеъмол қилди ва давлат институтларини шахсий манфаатлари йўлида ишлатди”, деди махсус прокурор.

Унга кўра, Юн президентлик ҳокимиятини чеклашга қаратилган конституциявий кафолатларни менсимаган. Ҳуқуқшуносларнинг айтишича, сўралган жазо айбланаётган хатти-ҳаракатларнинг оғирлигини акс эттиради.

Адолатга тўсқинлик қилиш айблови жорий йилнинг 3 январь куни юз берган ҳодисага бориб тақалади. Ўшанда Юн бир неча ҳафта давомида расмий қароргоҳида яширинган ҳолда юқори мансабдор шахсларни тергов қилиш бўйича идора терговчиларини ичкарига киритмаган.

Прокурорларга кўра, Юн қуролланган ва махсус жиҳозланган президент хавфсизлик хизмати ходимларига терговчиларни тўсиб қўйишни буюрган ва шу тариқа уларни ҳибсга олиш ордери ижросини тўхтатиш учун шахсий кучга айлантирган.

“Қонуний берилган ордерни тўсиш учун оғир қуролланган хавфсизлик ходимларининг сафарбар этилиши мисли кўрилмаган ҳолат”,  деди махсус прокурор.

Шунингдек, Юн ўтган йил 3 декабрь куни ҳарбий ҳолат эълон қилинишидан олдин бўлиб ўтган Вазирлар Маҳкамаси йиғилишида фақат айрим вазирларни чақириб, бошқаларни четда қолдирганликда айбланмоқда. Бу эса уларнинг муҳокамада иштирок этиш ҳуқуқини бузган.

Бундан ташқари, прокурорлар Юн ҳарбий ҳолат бекор қилингач, унга оид расмий ҳужжатларни орқага қараб сохталаштиришга уринганини, жумладан, ўша пайтдаги Бош вазир Хан Док Су ва собиқ Мудофаа вазири Ким Ёнг Хёндан имзо олишга ҳаракат қилганини билдирди.

Хан суд айбланаётган хатти-ҳаракатларнинг аниқлигини инобатга олиб, прокуратура талабига яқин ҳукм чиқариши эҳтимоли юқори, дея баҳолади.

Маълумот ўрнида, Юн илк бор январь ойи охирида исён етакчилигида айбланиб, расман унга нисбатан айблов эълон қилинган эди ва ҳозирда бир нечта жиноят ишлари бўйича суд жараёнларига дуч келмоқда. Суд махсус прокурор тўғрисидаги қонунга мувофиқ, айблов эълон қилинган кундан бошлаб олти ой ичида иш якунланиши шартлиги сабабли, 16 январга қадар ҳукм чиқарилишини маълум қилган.

Юн Сок Ёль иши 

Ўтган йилнинг 3 декабрь куни кечқурун Юн Сок Ёль Жанубий Кореяда ҳарбий ҳолат эълон қилган эди. Аммо бу ҳолат тахминан олти соатдан кейин бекор қилинди. Шундан сўнг, 14 декабрь куни Юн Сок Ёлга нисбатан импичмент эълон қилинди. Оқибатда унинг ваколатлари тўхтатилди.

Бирлашган тергов гуруҳи 14 декабрь куни парламентда импичмент эълон қилинганидан кейин ваколатлари тўхтатилган Жанубий Корея президенти Юн Сок Ёлни ҳибсга олишга ордер бериш учун Сеул судига мурожаат қилганди. Жанубий Корея суди терговчиларнинг илтимосини қаноатлантириб, Юн Сок Ёлни ҳибсга олишга ордер берди. Ордерга эга терговчилар 3 январь куни мамлакат тарихида биринчи марта президент қароргоҳига уни ҳибсга олиш мақсадида етиб борди, аммо терговчилар Юн Сок Ёлни ҳибсга олиш бўйича бўлган 5 соатлик қарама-қаршиликдан сўнг унга қарши ордер ижросини тўхтатишга қарор қилган. 7 январь куни Жанубий Корея суди мамлакат президенти Юн Сок Ёлни ҳибсга олиш учун яна ордер берди. 15 январь куни ҳуқуқ-тартибот идоралари Жанубий Корея президентини фитна иши бўйича ҳибсга олди.