Трамп Венесуэла нефтини яна 2 ой блокадада ушлаб туришни буюрди

Оқ уй АҚШ Қуролли кучларига яқин икки ой давомида Венесуэла нефтини “карантин” остида ушлаб туришга эътибор қаратишни буюрди. Бу ҳақда ўз манбасига таяниб, “Reuters” хабар берди.

Манбанинг айтишича, Вашингтон Каракасга нисбатан иқтисодий босимни, хусусан санкциялар орқали кучайтиришга қарор қилган, бироқ ҳарбий вариантлар ҳамон мавжуд.

“Агар Венесуэла АҚШ талабларига жиддий ён босмаса, январь ойи охирига бориб мамлакат иқтисодий фалокатга дуч келиши мумкин, деган қараш бор”, дейди нашр манбаси.

Эслатиб ўтамиз, жорий йил декабрь ўрталарида АҚШ Президенти Дональд Трамп Венесуэлага бораётган ёки ундан чиқаётган, санкциялар остига тушган барча нефть танкерларига нисбатан блокада эълон қилган эди. Шундан сўнг АҚШ Қуролли кучлари Венесуэла соҳиллари яқинида Skipper ва Centuries номли икки нефть танкерини қўлга олди. Учинчи кема – Bella 1 экипажи америкалик ҳарбийларнинг бортга чиқишига йўл қўймади, бироқ уни таъқиб қилиш давом этмоқда. Трамп АҚШ қўлга олинган танкерлар орқали мусодара қилинган нефтни ўзида сақлаб қолишини билдирди.

Венесуэла АҚШ ҳаракатларига жавобан ўз портларидан нефть танкерларини ҳарбий-денгиз флоти қўриқловида чиқаришни бошлади. Бу эса АҚШ ва Венесуэла ўртасида ҳарбий тўқнашув хавфини оширади.