Трамп Венесуэлага бораётган ва келаётган барча кемаларга блокада эълон қилди

АҚШ Президенти Дональд Трамп Венесуэлага йўл олган ва ундан чиқаётган, АҚШ санкциялари остига олинган нефть танкерларига нисбатан денгиз блокадаси жорий этилишини эълон қилди. Бу ҳақда Оқ уй раҳбари ўзининг Truth Social тармоғида ёзиб қолдирди.

Трампга кўра, у санкцияга тушган барча нефть танкерларига қарши “тўлиқ ва мутлақ блокада” ўрнатиш буйруғини берган. Венесуэла ҳукумати бунга жавобан бу қарорни мутлақо мантиқсиз деб атаб, у савдо ва денгизда эркин сузиш тамойилларини бузишини билдирган. 

Шу билан бирга, Трамп маъмурияти куз ойларида Кариб денгизида, Венесуэла соҳиллари яқинида АҚШ тарихидаги минтақа учун энг йирик денгиз гуруҳини, жумладан, энг катта авиация ташувчиси бўлган “Jerald F. Ford” бошчилигидаги кемалар гуруҳини жойлаштирган эди ва буни наркотиклар контрабандасига қарши кураш билан изоҳлаган. Трамп кенг баёнотида Венесуэла раҳбари Николас Мадуро бошчилигидаги ҳукуматни АҚШга тегишли бўлган нефть конларини эгаллаб олишда, терроризм, наркотрафик, одам савдоси ва қотилликларда айблади ҳамда Венесуэла Жанубий Америка тарихидаги энг йирик армада томонидан тўлиқ қуршаб олинганини, босим янада кучайишини таъкидлаган. 

Трамп, шунингдек, 24 ноябрь куни АҚШ Николас Мадуро ва унинг атрофини “хорижий террористик ташкилот” деб эълон қилганини ҳам эслатди. Венесуэла расмийлари эса бу айбловларнинг барчасини рад этиб, Трампнинг асл мақсади наркотик савдосига қарши кураш эмас, балки Мадуро бошчилигидаги чап қанот ҳукуматни ағдариш эканини айтмоқда. АҚШ ва бир қатор бошқа давлатлар Мадурони қонуний Президент сифатида тан олмайди. Ўтган ҳафта АҚШ ҳарбийлари Венесуэла соҳиллари яқинида санкция остидаги Скиппер номли нефть танкерини қўлга олди, ундан олдинроқ эса яна олти танкерга, шунингдек, Мадуронинг қариндошлари ва ҳамкорларига санкциялар жорий қилинди. Мутахассислар фикрича, нефть экспортининг блокланиши аллақачон қийин аҳволда бўлган Венесуэла иқтисодиётига оғир зарба бериши, валюта бозорига ва импортга таъсир қилиши, ҳатто озиқ-овқат ва дори-дармон танқислигига олиб келиши мумкин. 

ОАВнинг қайд этишича, Венесуэла йиллар давомида АҚШ санкцияларини четлаб ўтиб, нефтни катта чегирмалар билан қора бозорда сотиб келган ва унинг асосий харидори Хитой бўлиб қолмоқда. Венесуэла дунёдаги энг йирик тасдиқланган нефть захираларига эга бўлиб, уларнинг ҳажми қарийб 303 миллиард баррелни ташкил этади.

Эслатиб ўтамиз, аввалроқ Дональд Трамп Венесуэладаги наркокартелларга қарши тез орада қуруқликдан зарбалар берилишини маълум қилганди.