Тожикистон-Афғонистон чегарасида яна отишма бўлди. Қурбонлар бор

Кеча, 24 декабрь куни Тожикистоннинг Шамсиддин Шохин тумани Баҳорак ҳудудидаги Тожикистон-Афғонистон чегарасида тўқнашув юз берди. Бу ҳақда “8am.media” хабар берди.

Маҳаллий манбаларга кўра, тўқнашув Тожикистон чегарачилар ва Афғонистондан келган қуролли контрабанда гуруҳлар ўртасида бўлган.

Тажикистон томондан икки офицер ҳалок бўлган. Улар – 28 ёшли Исматулло Қурбонов ва 33 ёшли Зиребон Наврузбеков.

Манбалар, шунингдек, бир нафар тожик аскари ҳам ҳалок бўлганини билдирган, аммо бу расман тасдиқланмаган.

Бошқа бир манба Афғонистондан бўлган беш нафар контрабанда аъзосининг ҳалок бўлгани, бирини эса қўлга олинганини айтган. Яна бир манба эса умумий контрабанда аъзоларини 8 киши деб ҳисоблаган, улардан тўрт нафари қочган.

Шу куни Тожикистон чегара ҳудудида тўртта янги назорат-ўтказиш пункти очилган. Президент Имомали Раҳмон онлайн тарзда тадбирда иштирок этган.

Охирги йилларда чегара бўйича жами 80 пункт қурилган, айримлари халқаро ташкилотлар ва хорижий давлатлар иштирокида яратилган.

Маълумот учун, Тожикистон-Афғонистон чегараси тахминан 1400 км. Ҳукумат Афғанистондаги вазиятдан хавотирда, айниқса наркотоварлар ва қуролли гуруҳларнинг яширин ҳудудлари сабабли. Сўнгги бир ой ичида икки ҳужум оқибатида Шамсиддин Шохин ва Дарвоз ҳудудларида 10 нафар Хитой ишчиси ҳалок бўлган ёки яраланган. Улар орасида олтин қазиб олиш ва йўл қурилиши билан шуғулланган ишчилар бор. Тожикистон ҳужумларни террористик акт сифатида қоралаган, Хитой эса воқеаларни тергов қилишни талаб қилган.

Эслатиб ўтамиз, аввалроқ Тожикистон чегара қўшинлари Афғонистондан чегарани ноқонуний кесиб ўтишга уринган бир гуруҳ контрабандачиларни зарарсизлантириш учун биринчи марта маҳаллий ишлаб чиқарилган дрондан фойдаланганди. Воқеа 20 ноябрга ўтар кечаси Ҳамадоний чегара туманида содир бўлган. Етти нафар контрабандачилар гуруҳи чегарани кесиб ўтаётганда ҳужумга учраган. Эрталаб воқеа жойида икки нафар Афғонистон фуқароси: Авалмир ўғли Шерохо ва Ҳаким ўғли Жумагулнинг жасадлари топилган.