Қаҳратон қиш Украина учун энг хавфли қурол – Зеленский

2025 йилдаги қишнинг совуғи Украина учун “энг хавфли қуроллардан бири”га айланиши мумкин. Бу ҳақда Украина Президенти Владимир Зеленский Нидерландия парламентида сўзлаган нутқида маълум қилди.

Қайд этилишича, энергетика хавфсизлиги масаласига тўхталган Зеленский Москва совуқ об-ҳавони украиналикларнинг одатий ҳаётига қарши ишлатишга уринаётганини таъкидлаган.

“Шу боис, бўшашмаслик ва фақат дипломатияга суяниб қолмаслик жуда муҳим. Биз ҳаво ҳужумидан мудофаа тизимларимизни мустаҳкамлашимиз, ўзимизни ҳимоя қилиш қобилиятимизни қўллаб-қувватлашимиз керак”, дейди Владимир Зеленский .

Шунингдек, Украина раҳбари Нидерландияга Киевга тақдим этилган Patriot зенит-ракета мажмуалари, F-16 қирувчи самолётлари ҳамда бошқа кўмаклар учун миннатдорлик билдирган.

Маълумот учун, сўнгги пайтларда Украина расмийлари портлашлардан кейин электр ва иссиқлик таъминотида узилишлар кузатилаётгани ҳақида бир неча бор хабар берган. Жумладан, Украина ички ишлар вазири Игорь Клименко 13 декабрь куни мамлакатда 1 миллиондан ортиқ абонент электр таъминотисиз қолганини маълум қилган. Шундан сўнг, Россия Мудофаа вазирлиги Украинадаги ҳарбий-саноат мажмуаси ва энергетика объектларига “Россия ҳудудидаги фуқаролик объектларига қилинган Украина томонидан амалга оширилган террорчилик ҳужумларига жавобан” зарбалар берилганини билдирган. Россия Мудофаа вазирлиги зарбалар фақат Украинадаги ҳарбий ва энергетика объектлари ҳамда улар билан боғлиқ инфратузилмаларга берилаётганини бир неча бор таъкидлаган.

9 декабрь куни Зеленский, агар Россия томони ҳам бу қадамни қўллаб-қувватласа, Украина “энергетик сулҳ”га тайёр эканини билдирган. Кремль бунга жавобан Москва вақтинчалик сулҳ эмас, балки “барқарор, кафолатланган ва узоқ муддатли тинчлик”ка интилаётганини маълум қилган.

Эслатиб ўтамиз, аввалроқ Зеленский Россия ва Украина ўртасидаги тинчлик келишуви доирасида ҳудудларни бўлиш масаласида Киев ва Вашингтоннинг позициялари ҳозирча фарқ қилаётганини маълум қилганди.