Блокада халқаро ҳуқуққа зид – Венесуэла

Венесуэла АҚШ Президенти Дональд Трампнинг блокада ҳақидаги баёнотини халқаро ҳуқуқни бузиш сифатида қабул қилмоқда. Бу ҳақда Венесуэла вице-президенти Делси Родригес ўзининг Telegram-каналида ёзиб қолдирди. 

Родригесга кўра, Трампнинг табиий ресурсларни ўғирлаш ҳақидаги даъволари ва блокада эълон қилиниши халқаро ҳуқуқ, савдо ва денгиз ҳаракатланиш эркинлигини бузади.

Венесуэла ҳукумати мамлакат суверенитетини, табиий ресурслар устидаги назоратини ва Кариб денгизи ҳамда глобал океандаги савдо ва навигация эркинлигини ҳимоя қилишини таъкидлаган. 

Қайд этилишича, Каракас барча ҳаракатларини халқаро ҳуқуқ ва БМТ Низоми доирасида амалга оширади ва бу ҳаракатлар блокада таҳдидларига қарамай давом этади. Венесуэланинг БМТдаги доимий вакили бу “халқаро ҳуқуқнинг жиддий бузилиши”эканлигини айтиб, уни қоралашини билдирган.

Сўнгги ойларда АҚШ Кариб денгизи минтақасига қўшин ва ҳарбий техникаларни жамлаган, сентябрдан бошлаб эса Вашингтоннинг иддаосига кўра, наркотрафикка алоқадор бўлган кемаларга зарбалар бера бошлаган. Ноябрь охирида Трамп Венесуэла устидаги ҳаво ҳудуди ёпилганини эълон қилган, бироқ кейинроқ бу мамлакатга зарба берилиши муқаррар дегани эмаслигини айтган.

Венесуэла ТИВ буни куч ишлатиш билан таҳдид ва БМТ низомини бузиш сифатида баҳолаган ҳамда АҚШни Венесуэла билан можарога боришдан тийилишга чақирган. 

Шу ҳафта Трамп Венесуэла қирғоқлари яқинида нефть ташувчи танкер қўлга олингани ҳақида ҳам айтган эди. “The New York Times” маълумотига кўра, гап Skipper номли танкер ҳақида бормоқда, у жорий йилнинг февралидан июлигача Эрондан Хитойга қарийб 2 миллион баррель нефть ташиган.

Трамп Мадуро ҳокимияти якунига яқинлашаётганини айтган. Венесуэлада Қуролли кучларга сафарбарлик эълон қилинган, Мадуро эса АҚШни тинчликка чақирмоқда. ОАВ маълумотига кўра, октябрь охирида Трамп венесуэлалик етакчи билан суҳбатда агар Мадуро ихтиёрий равишда лавозимини тарк этмаса, куч ишлатишга тайёр эканини билдирган.

Москва Каракасни қўллаб-қувватламоқда ва Трамп маъмуриятини Венесуэла билан тўлиқ миқёсли можарога чуқур киришмасликка чақирмоқда. Россия Президенти Владимир Путин 11 декабрь куни Мадуро билан телефон орқали гаплашган. Кремль хабарига кўра, томонлар икки давлат ўртасидаги муносабатларни янада ривожлантириш масалаларини муҳокама қилган.