Сурхондарёда 71 ёшли эркак тушлик тайёрламаган хотинини ўлдирди

Сурхондарё вилоятида 71 ёшли эркак тушлик тайёрламаган хотинини ўлдирди. Бу ҳақда Олий суд матбуот котиби Азиз Обидов хабар берди.

Қайд этилишича, воқеа 15 сентябрь куни тахминан соат 14:30 да Сариосиё тумани “Афросиёб” маҳалласида содир бўлган. Эркак уйда овқат йўқлигидан норозилик билдирган, аёл эса унга “уй ишларига умуман ёрдам бермайсан, фақат овқат талаб қиласан” деб жавоб берган. Можаро ортидан эркак ошхона пичоғини олиб ҳовлига чиққан ва хотинининг чап кўксига икки марта пичоқ урган. Жароҳатлар юрак, ўпка ва аортани шикастлагани сабабли аёл воқеа жойида ҳалок бўлган.

Судда эркак айбини тан олиб, келиб чиққан можаронинг сабаби “доимий тушунмовчиликлар” бўлганини айтган. Шунингдек, аниқланишича, жабрланувчи 2024 йилдан бери сурункали буйрак касаллигидан азият чеккан ва I гуруҳ ногирони бўлган. Оғир аҳволига қарамай, эркак хотинини мунтазам ҳақорат қилган. Суд воқеани қасддан одам ўлдириш, деб баҳолаб, уни умумий тартибли колонияда 10 йил озодликдан маҳрум этиш жазосига ҳукм қилди.

Эслатиб ўтамиз, аввалроқ Навоийда эр алиментдан воз кечмаган хотинини машинада уриб кетганди.