Туркия аэропортида ўзбекистонликлар 61 кг олтин билан қўлга тушди

Туркияда 5 ўзбекистонлик 61 кг олтин билан қўлга тушди. Бу ҳақда маҳаллий оммавий ахборот воситалари ёзмоқда. 

3 аёл ва 2 эркакдан иборат гуруҳ Ўзбекистондан аввал Туркиянинг Истанбул шаҳрига, сўнг транзит рейс билан Кападокия вилоятининг Невшеҳир аэропортига учган. Уларнинг буюмлари орасидан гўшт майдалагичлар ва миксер қурилмалари ичига яширилган 61 килограмм 121 грамм олтин топилган. Олтин қуймалари мусодара қилиниб, 5 шубҳали ва уларни кутиб олиш учун аэропортга келган фуқаро қўлга олинган. 

Маълум қилинишича, вилоят полиция бошқармасининг Контрабанда ва уюшган жиноятчиликка қарши кураш бўлими гуруҳлари Невшеҳир ва Гулшеҳир бош прокуратуралари раҳбарлигида шаҳарга келиши керак бўлган беш нафар Ўзбекистон фуқароси ҳақида аввалдан маълумотга эга бўлган. 

Истанбул орқали Невшеҳирга учиб келган гумондорларнинг юклари тинтув қилинганда, олтинлар  гўшт майдалагичлар ва миксер қурилмасига эҳтиёт қисмлари сифатида эритиб жойлаштирилгани аниқланган.  

Полиция бўлимида текширувдан сўнг, гумондорлар суд биносига жўнатилган. 

Шу ўринда савол туғилади, наҳот Ўзбекистон божхоначалари 61 кг олтин олиб чиқиб кетилсаю буни аниқлай олмаса?!