Бердимуҳамедов кортежи сабаб ҳомиладор аёл вафот этди

north_east

Бердимуҳамедовлар яна битта “учар сарой” буюртма қилди

Жорий йилнинг 15 октябрь куни Лебап вилоятининг Туркманобод шаҳрида хавфсизлик кучлари Туркманистон Президенти Сердар Бердимуҳамедов кортежи сабаб йўллар тўсиб қўйилгани ортидан етти ойлик ҳомиладор аёл шифохонага киролмай вафот этди. Бу ҳақда “24.kg” хабар берди.

Ўша куни Бердимуҳамедов Туркманободдаги Сапармурод Ниёзов номидаги кимё заводида минерал ўғитлар ишлаб чиқариш мажмуасининг пойдеворини қўйиш маросимида иштирок этган. Шу муносабат билан, шаҳардаги кўча ва йўллар ёпилган, хавфсизлик ва милиция ходимлари бир неча соат давомида транспорт ва пиёдалар ҳаракатини чеклаган.

Аёлнинг эри уни шифохонага олиб кетаётган эди, бироқ уларни йўлда хавфсизлик кучлари тўхтатиб, ўтишга рухсат бермаган. Нашрнинг ёзишича, эркак хавфсизлик кучларига тиз чўкиб ёлворган, улар эса хиёбонлар орқали туман тиббиёт бирлашмасига боришни айтган. Воқеа тафсилотлари билан яхши таниш бўлган тиббиёт ходимининг айтишича, аёл эрининг қўлида ҳалок бўлган. Улар шифохонага етиб боришганида шифокорлар бошқа ҳеч нарса қила олмасликларини айтишган.

“Унинг эри тез ёрдам машинаси етиб бора олмагани ва йўлдаги хавфсизлик хизмати ходимлари ўтказиб юбормагани учун аёлни машинасида олиб келди. Туркманободлик аёл ўз вақтида тиббий ёрдам кўрсата олмаган ва туғилмаган боласи билан бирга эрининг қўлида вафот этган”, деган тиббиёт ходими.

Маълумотларга кўра, хавфсизлик ходимлари эркакнинг олдига бориб, аёлининг Президент кортежи сабаб вафот этганини сир сақлашни талаб қилган. Маҳаллий аҳолининг хабар беришича, оиланинг уйи хавфсизлик кучлари томонидан қўриқланмоқда, эркакнинг ўзига эса таҳдидлар бўлган.

Шифохона ходимларининг хабар беришича, Президент ташрифи куни ҳатто тез ёрдам машиналари ҳам ҳаракатлана олмаган.

Марҳумнинг турмуш ўртоғи Президент Бердимуҳамедовга шикоят қилиб, адолат излашини, шунингдек, воқеа ҳақида ОАВ ва БМТга хабар беришини айтган. Ўшандан бери хавфсизлик кучлари ҳам унинг уйига бориб, унга: “Ўғлингнинг келажаги ва соғлиғи ҳақида қайғур” деган.

Туркманистон расмийлари воқеа юзасидан изоҳ бермаган. Маҳаллий ОАВ ҳам ҳодиса тўғрисида хабар бермади.