Украинада “Қизалоқ ва маймоқ”ни кўриш тақиқланиши мумкин

Россия билан алоқаси борлиги учун Украинада “Қизалоқ ва маймоқ” мултфильмига нисбатан санкциялар жорий этилиши мумкин. Бу ҳақдаги таклифни Украина парламенти матбуот эркинлиги қўмитаси раиси Ярослав Юрчишин илгари сурди.

Юрчишиннинг сўзларига кўра, мултфильмнинг украинча таржимасида ҳам Россия пропагандасига хос империя ва милитаризация унсурлари мавжуд. 

Унинг қайд этишича, мултфильмлар болалар онгига кириш учун Россия томонидан ишлатиладиган катта майдон бўлиб, ота-оналар кўпинча YouTube’да болаларига нима қўйилаётганини эътиборсиз қолдиради. 

“Шунинг учун Россия контентини тозалаш ва ўзимизнинг брендни яратишни рағбатлантириш зарур”, деган Ярослав Юрчишин. 

Қайд этилишича, мултфильмда Россия пропагандасига оид белгилар аниқланган – бош қаҳрамон ҳар доим жазоланмаслиги, баъзи эпизодларда у Совет даврининг шляпасида кўриниши. 

Санкциялар жорий этилган тақдирда, полиция контентга киришни чеклашга ёрдам бермоқчи.

“The Times” нашрига кўра, қизалоқ Россиянинг “юмшоқ кучи” сифатида қабул қилиниши мумкин ва мултфильм болаларда муайян қадриятларни шакллантиришда ишлатилади.