Индонезияда нефть танкери ёниб кетди. Қурбонлар бор (видео)

Кеча, 15 октябрь куни Индонезиянинг Батам оролида таъмирдаги танкер ёниб кетди ва ҳодиса оқибатида 10 киши ҳалок бўлди. Бу ҳақда “Синьхуа” хабар берди.

Нашр маълумотига кўра, ёнғин маҳаллий вақт билан эрталаб 04:00 ларда, Батам оролидаги Риау провинциясида жойлашган кема таъмирлаш верфида турган нефть танкерида чиққан. Расмий маълумотларга кўра, ҳалок бўлганларнинг барчаси Федерал II танкерида ишлаган ишчилар бўлган. Яна 21 нафар ишчи тан жароҳати олган.

Полициянинг хабар беришича, айнан мазкур кемада жорий йилнинг июнь ойида ҳам шунга ўхшаш ҳодиса юз берган ва ўшанда тўрт нафар ишчи ҳалок бўлган. Ҳозирда воқеа сабабларини аниқлаш бўйича тергов олиб борилмоқда.

Эслатиб ўтамиз, аввалроқ Қора денгизнинг Болгария қирғоқлари яқинида бортида Украинанинг 10 нафар денгизчиси бўлган юк кемаси чўкиб кетганди. Камерун давлати байроғи остида сузиб бораётган “EILEEN” юк кемаси чўкишни бошлагандан сўнг экипаж аъзолари қутқариб олинган.