АҚШ чегарасини ноқонуний кесиб ўтиш бўйича антирекорд ўрнатилди
Олам
−
09 Октябрь 2025 7221 2 дақиқа
2024 йилнинг октябридан жорий йилнинг сентябригача бўлган даврда АҚШ чегарачилари АҚШ-Мексика чегарасини ноқонуний кесиб ўтишга уриниш билан боғлиқ деярли 238 мингта ҳолатни қайд этган. Бу 1970 йилдан бери энг паст кўрсаткич бўлиб, ўшанда тахминан 202 мингта шундай уриниш қайд этилган. Ушбу рақамларни АҚШ Ички хавфсизлик департаменти маълумотларига таяниб, CBS News келтирди.
Телеканалга кўра, жорий йил кўрсаткичлари Жо Байден маъмурияти давридагилардан кескин фарқ қилади. Масалан, 2022 йилда 2,2 миллион киши рухсатсиз тарзда АҚШ ҳудудига киришга уринган – бу бутун тарихдаги рекорд натижа ҳисобланади. Ўтган 12 ой ичидаги ноқонуний ўтишларнинг 60 фоиздан ортиғи ҳам айнан Байден даврида содир бўлган.
“Президент Трамп жанубий чегарамизни ҳимоя қилиш ҳақидаги ваъдасини тўлиқ бажармоқда”, дейди Оқ уй вакили Эбигейл Жексон.
Шу билан бирга, Миграция сиёсати институти эксперти Ариэль Руиз Сотонинг фикрича, ноқонуний ўтишлар сонининг камайиши 2024 йил ёзидаёқ бошланган. Ўшанда Байден маъмурияти бошпана бериш тартибини кескин қатъийлаштирган. Экспертнинг сўзларига кўра, Трамп маъмурияти кейинги бир неча ой ичида миграция оқимининг янги меъёрини ўрнатган.
Эслатиб ўтамиз, аввалроқ Дональд Трамп маъмурияти 14 ёшдан катта бўлган норасмий мигрант ўсмирларга ўз ихтиёри билан ватанларига қайтган тақдирда 2500 доллар миқдорида тўлов таклиф қилишни режалаштираётгани ҳақида хабар берилган эди.
