АҚШ Конгресси “шатдаун”га тайёргарлик кўрмоқда – “Axios”

АҚШ Конгресси ҳукумат фаолиятининг вақтинчалик тўхтатилишига (“шатдаун”) тайёргарлик кўрмоқда. Бу ҳақда кеча, 26 сентябрь куни ўз манбасига таяниб, “Axios” хабар берди.

Манбанинг билдиришича, агар Конгресс жорий йилнинг 1 октябригача бюджетни қабул қилишга улгурмаса, федерал идоралар фаолияти тўхтаб қолиши мумкинлиги боис бир нечта конгресс делегацияларининг сафарлари бекор қилинган.

“Сафарларнинг бекор қилиниши – ҳукумат хизматчилари “шатдаун”га ҳозирлана бошлаганининг энг яққол белгиларидан бири, чунки республикачилар ва демократлар бюджет масаласида келишувдан анча йироқ кўринмоқда”, дейилади хабарда.

“Axios” маълумотига кўра, Вакиллар палатасининг Назорат қўмитаси ҳамда Фан, космос ва технологиялар қўмитаси делегацияларининг камида икки сафари бекор қилинган. Ҳар икки ҳолатда ҳам давлат хизматчиларига сафарлар “шатдаун” эҳтимоли сабабли тўхтатилгани билдирилган.

Нашр манбаларидан яна бири Назорат қўмитаси ташкиллаштирган учинчи сафар ҳам бекор қилинганини айтган. Бироқ Республикачилар партияси вакиллари сафарни расмий тарзда бекор қилинмаганини, делегация аъзоларининг ўзлари қатнашмасликка қарор қилганини билдирган.

Бунгача АҚШ Президенти Дональд Трамп республикачиларни ҳукумат фаолиятини ёпилишдан сақлаш учун вақтинчалик молиялаштиришни қўллаб-қувватлашга чақирган ва демократларни “шатдаун”ни атайлаб юзага келтирмоқчи бўлаётганликда айблаган.

Маълумот учун, АҚШда янги молия йили 1 октябрда бошланади. Агар Капитолий тепалигида ҳеч бўлмаганда қисқа муддатга мўлжалланган вақтинчалик молиялаштириш резолюцияси қабул қилинмаса, федерал идоралар номаълум муддатга ёпилиши мумкин. АҚШ тарихидаги энг узоқ “шатдаун” 35 кун давом этган бўлиб, у ҳам Дональд Трампнинг биринчи президентлик даврида юз берган.